Qeveria vendosi të rrisë me 3,3% të gjitha kategoritë e pensioneve në Shqipëri. Ministrja e Financave, Delina Ibrahimi, u shpreh se ky indeksim pensionesh vjen si ndihmë për të përballuar shtrenjtimin e produkteve në Shqipëri. “Qeveria vendosi të indeksojë të gjitha kategoritë e pensioneve, edhe ato të parakohshme, në vlerën e 3,3%. Kosto në buxhetin e shtetit është 3,3 miliardë lekë”, tha ajo në një prononcim për mediat gjatë paradites.
Por sa i ndihmon kjo rritje pensionistët? Inflacioni në muajin shkurt ishte në vlerën e 3,9% ose thënë ndryshe, çmimet në vend u rritën mesatarisht me 3,9%. Ndërkohë qeveria vendosi një rritje prej 3,3% të emisioneve duke mos reflektuar realitetin në raftet e dyqaneve. Megjithëse, sipas ministres, propozimi fillestar për indeksimin ishte 2,4%, në fund rritja u vendos të ishte 3,3%.
Pra sipas ministres, qeveria ka rritur nivelin e indeksimit me 0,9% krahasuar me paratë që kishte ndarë mënjanë kur miratoi buxhetin vjetor për 2022. Përkthyer në para, fjalët e ministres do të thonë se rritja e indeksimit nga 2,4% në 3,3% është e barasvlershme me 135 lekë në muaj, gjithmonë duke marrë për bazë pensionin mesatar në qytet e jo në fshat që është mesatarisht në vlerën e 9295 lekëve.
Kësisoj, arka e hapur për pensionistët, që përbëjnë edhe shtresën e shoqërisë që ndjen më shpejt rritjen galopante të çmimeve, do të thotë një bukë masive më shumë në muaj që nuk mund të shoqërohet me asgjë tjetër.