Analistja Edlira Gjoni u shpreh në Absolut 4 se nuk e përjashton mundësinë që presidenti i ri i vendit të jetë nga radhët e grupit të PS.
Gjoni theksoi se mund të jetë dikush nga radhët e socialistëve, të cilin kryeministri Rama kërkon ta largojë dhe si mundësi mund të jetë vendosja e tij president.
“Kryeministri nuk na ka lënë hapësirë që ne t’i besojmë gjithçka që ai thotë dhe kështu deklarata e tij se presidenti i ri nuk do të jetë nga grupi socialist, hyn tek ato deklarata që unë nuk është se e besoj shumë. Në fund edhe mund të jetë, për simbolizëm apo për arsye të tjera mund t’i duhet në momentin e fundit. Unë nuk e përjashtoj fare. Rama e caktoi Metën president për ta futur në kafazin e artë. Presidenca në sytë e Ramës vazhdon të jetë një kafaz i artë.
Mund të kemi ndonjë tigër tjetër në presidencë, të cilin nuk mund ta largojmë dot nga politika dhe e çojmë në president. Megjithëse, unë mendoj se do të kemi një emër surprizë. Për shembull mund të sjell edhe zonjën Çomo, ajo nuk është më në parlament”, tha Gjoni.