Hepatiti akut edhe pas gripit spanjoll, dyshimet për ndikimin nga Covid-19, rriten rastet te fëmijët

Përditësuar më: 30/4/2022, ora 15:53

Hepatiti akut edhe pas gripit spanjoll, dyshimet për ndikimin nga Covid-19, rriten rastet te fëmijët

Përditësuar më: 30/4/2022, ora 15:53

Hepatiti akut te fëmijët është alarmi më i ri për ekspertët e shëndetit publik. Në Shqipëri ende nuk ka raste të konfirmuara, por në shtete të tjera po rritet numri i fëmijëve të prekur nga kjo sëmundje.

Britania e Madhe është një nga vendet më  të prekura ndaj dhe studimet këtë periudhë janë përqendruar në gjetjen e shkaktarëve të këtij virusi.

Eksperti i shëndetit publik në Britaninë e madhe, Leidon Shapo thotë për A2 se ky shpërthim i hepatit mund të këtë lidhje më situatën pas pandemisë. Sipas studimeve te deritanishme, një situatë e tillë është regjistruar 1 shekull më parë, pas gripit spanjoll. 

“Universiteti Spitalor i Birmingamit iu është rikthyer të dhënave historike dhe kanë parë se një shpërthim i tille te këto mosha është regjistruar në 1924, fill pas përfundimit të pandemisë së gripit spanjoll. Kjo hedh dritë që edhe sikur shkaktari të jetë i njohur, një andenovirus, kemi të bëjmë me një terren të përgatitur nga pandemia. Këto grupmosha nuk kanë qenë të ekspozuara sa duhet ndaj Sars Cov-2”, tha Shapo.

Sipas studimeve të deritanishme andenovirusi 41 mendohet të jetë shkaktari i shpërthimit të hepatit akut në këtë periudhë. Ndërsa në hipotezat e mjekëve nuk përjashtohet një mbivendosje e mundshme e këtij virusi me Covid-19.

Doktor Leidon Shapo thotë se edhe sistemi shëndetësor në Shqipëri duhet të jetë në gatishmëri. Mjekët dhe prindërit duhen të kenë kujdes ndaj çdo shenje që mund të shfaqen fëmijët këtë periudhë që ngatërrohen me virozat e stinës.  

Edhe pse ka rritje të rasteve me hepatitin akut kryesisht tek fëmijët nën 10 vjeç, pjesa më e madhe janë shëruar. Deri tani është shënuar një humbje jetë dhe disa pacientë kanë patur nevojë për transplant mëlçie.