Interi vuan tmerrësisht pjesën e parë por përmbys gjithçka në 45 minutat e dyta ndaj Empolit, për të mbajtur ende të gjalla shpresat për fitoren e titullit në Serie A.
Zikaltrit e fillojnë në mënyrën më të keqe, edhe nga ana simbolike, kur në minutën e 5-të është Andrea Pinamonti, ende në pronësi të Interit dhe lojtar i rritur në klubin milanez, ai që shënon pas një kundërsulmi perfekt.
Reagimi i kampionëve të Italisë ishte i furishëm, por i kotë. Ishte në fakt talenti shqiptar Kristjan Asllani që do të zhyste në “ferr” tifozerinë interiste në minutën 28, ku realizon po në kundërsulm golin e tij të parë në kampionatin italian.
Shpresat për Interin rikthehen pas një devijimi të Simone Romagnolit, që nuk është ai i Milanit por që i shton simbolizëm ndeshjes me autogolin e tij. Interi merr kurajë dhe barazon me Lautaro Martinez në fund të pjesës së parë.
Pjesa e dytë flet vetëm për milanezët, me raste të njëpasnjëshme që nuk konkretizohen, deri në golin e Martinez në minutën 64. Goli i kilianit Sanchez në sekondat e fundit vlen vetëm për statistikë, Interi për një natë është kthyer në kreun e Serie A dhe pret me padurim ndeshjen e “kushërinjve” të Milanit kundër Veronës.