“Unë bëj çfarë të dua me armët e mia”, kongresmeni nxjerr pistoletën në seancën e Kongresit

Përditësuar më: 3/6/2022, ora 18:28

“Unë bëj çfarë të dua me armët e mia”, kongresmeni nxjerr pistoletën në seancën e Kongresit

Përditësuar më: 3/6/2022, ora 18:28

Një kongresmen amerikan ka nxjerrë pistoletat gjatë një dëgjese në Dhomën e Përfaqësuesve, ku po diskutohej për kufizimin e blerjes së armëve në Shtetet e Bashkuara të Amerikës.

Në një seancë të jashtëzakonshme pas shumë incidenteve me armë në javët e fundit, ku kanë humbur jetën dhjetëra persona, përfshirë 19 fëmijë në një shkollë të Teksasit, republikani Greg Steube, i cili po merrte pjesë në mbledhje virtualisht nga shtëpia e tij në Florida, nxori me radhë 4 pistoletat e tij.

“Ja një pistoletë që unë e mbaj çdo ditë me vete për të mbrojtur veten, gruan, fëmijët dhe shtëpinë time”, tha kongresmeni.

Kur kreu i seancës, Jerrold Nadler, ndërhyri duke i thënë se shpresonte që arma të mos ishte e mbushur, republikani i ktheu këtë përgjigje: “Jam në shtëpinë time. Bëj çfarë të dua me armët e mia”.

Presidenti Joe Biden i bëri thirrje Kongresit të bëhet bashkë dhe të punojë për reformim të ligjeve për armët: “Kjo nuk ka të bëjë me marrjen e armëve dhe kryqëzimin e pronarëve të armëve. Në fakt, ne besojmë se duhet të trajtojmë pronarët përgjegjës të armëve, si një shembull se si duhet të sillem të tjerët”.

Presidenti listoi veprimet që duhet të ndërmerren: “Duhet të ndalojmë armët e sulmit. Nëse nuk ne bëjmë dot këtë duhet të rrisim moshën për t’i blerë ato, nga 18 në 21 vjeç. Duhet të fuqizojmë kontrollet lidhur me historikun e blerësit, të heqim imunitetin që mbron prodhuesit e armëve nga përgjegjësia dhe të adresojmë krizën e shëndetit mendor”.