Marrëdhëniet mes Kosovës dhe Greqisë po bëhen gjithnjë e më të ngushta. Ky ishte një ndër konkluzionet e nxjerra nga kryeministri, Albin Kurti pas vizitës së shkurtër të ministrit grek të Jashtëm, Nikos Dendias në Prishtinë.
Takimi mes tyre ndodhi gjatë një darke pune, ndërsa të vetmet deklarata u dhanë përmes rrjetit social Twitter.
“Marrëdhëniet e Kosovës me Greqinë po afrohen çdo ditë e më shumë. Është një dëshmi e marrëdhënieve tona të mira dypalëshe, por edhe një njohje e vlerave tona të përbashkëta të lirisë dhe demokracisë”, ishin fjalët e Albin Kurtit.
“Në përmbyllje të vizitës time në Prishtinë, takova kryeministrin kosovar Albin Kurti, me të cilin pata një shkëmbim të frytshëm pikëpamjesh për mënyrat e zgjerimit të bashkëpunimit ekonomik dhe energjetik, zhvillimet e fundit në dialogun Beograd-Prishtinë dhe rrugëtimin e Ballkanit Perëndimor për në BE”, deklaroi Nikos Dendias.
Fillimisht ministri i Jashtëm grek dhe ekipi i tij u pritën në Prishtinë nga zëvendëskryeministri Bislim Bislimi. Mes tyre pati dhe një takim në godinën e qeverisë së Kosovës. Dendias u prit edhe nga presidentja Vjosa Osmani, e cila tha se Athina dhe Prishtina ndajnë të njëjtat vlera euroatlantike.
Ajo kërkoi mbështetjen e Greqisë për anëtarësim në Këshillin e Europës, Partneritetin për Paqe dhe NATO, si një garanci jo vetëm për shtetin e Kosovës, por edhe për mbarë rajonin. Osmani shprehu gatishmëri për thellimin e bashkëpunimit mes vendeve, me shpresën që së shpejti do të formalizohet vendimi i Greqisë për njohjen e pavarësisë së Kosovës.