Kosta Rika është skuadra e fundit që kualifikohet në Botërorin 2022. Skuadra e Amerikës Qendrore triumfoi 1-0 në ndeshjen play-off përballë Zelandës së Re.
Sfida e luajtur në fushën asnjanëse të Al Rayyan u vendos nga goli i Joel Campbell, prej sekondave të para të lojës. Ish-sulmuesi i Arsenalit, shfrytëzoi një aksion të rrëmujshëm në zonën kundërshtare, duke e dërguar topin në rrjetë.
Neo-zelandezët provuan të reagonin, pavarësisht se mbeten në inferioritet numerik pas kartonit të kuq direkt të Barbarouses. Megjithatë, pika e fortë e Kosta Rikës mbetet portieri i Paris Saint Germaine, Keylor Navas, i cili ishte i pakalueshëm. Në fund, ata festuan pjesëmarrjen e tretë historike në Kupën e Botës.
Me këtë triumf, ekipi nga Amerika Qendrore plotëson Grupin E në Katar 2022, ku do të luajnë kundër Spanjës, Gjermanisë dhe Japonisë.
Ky është edhe grupi më i vështirë i eventit të parë në histori, që do të luhet në dimër. Eventi do të nisë më 21 nëntor 2022 dhe do të përfundojë me finalen e datës 18 dhjetor.