Sondazh: Destinacionet e fundjavave tuaja janë:
  • Bregdeti 60%
  • Zonat malore 20%
  • Qendrat historike 20%

Putin vendos vija të reja të kuqe dhe kërcënon Perëndimin me raketat unike

Nga A2 CNN
1 Gusht 2022, 10:23 | Bota

Presidenti rus, Vladimir Putin, ka vendosur vija të reja të kuqe për Perëndimin në Detin e Zi, Baltik dhe Arktik, përmes një doktrine të re detare. Kësaj i shtohet edhe njoftimi i Putinit për raketat e reja hipersonike “Tsirkon”, të cilat janë unike dhe me të cilat do të pajiset marina ruse në muajt e ardhshëm.

“Ne kemi shënuar haptazi kufijtë dhe zonat e interesave kombëtare të Rusisë, ekonomike dhe strategjike”, tha Putin në një fjalim të shkurtër me rastin e Ditës së Marinës në Shën Pjetërburg. Këto zona mbulojnë zonën e Arktikut, ujërat e deteve të Zi, Okhotsk dhe Bering, si dhe Ngushticën Baltike dhe Kuril.

Kjo doktrinë e re detare thekson ambicien e Moskës për të qenë një “fuqi e madhe detare” dhe vë në dukje Shtetet e Bashkuara të Amerikës si kërcënimin kryesor për sigurinë e saj.

“Politika strategjike e Shteteve të Bashkuara bazohet në dominimin e oqeaneve dhe zgjerimin e NATO-s gjithnjë e më afër kufijve të Rusisë”, tha Putin.

Doktrina detare, e cila ka 55 faqe, do t'i lejojë Moskës të zgjerojë potencialin e saj detar duke përshpejtuar mobilizimin e burimeve nga Marina. Kjo përfshin anijet civile dhe ekuipazhin, si dhe përdorimin e infrastrukturës detare në kohë lufte.

Në fjalimin e tij, Putin nuk përmendi situatën në Ukrainë. Megjithatë, doktrina e re mbron një “forcim të plotë të pozitës gjeopolitike të Rusisë” në Detin e Zi dhe Detin Azov.

Në paradën që u mbajt të dielën në ishullin Kronstadt, Rusia tregoi potencialin që ka sot. Morën pjesë më shumë se 40 anije dhe nëndetëse, 42 avionë dhe më shumë se 3500 ushtarë.

Ndërsa Putin po nënshkruante doktrinën e re ushtarake, Rusia ka akuzuar Ukrainën se ka sulmuar selinë e flotës ruse të Detit të Zi në Sevastopol me një dron. Gjashtë persona u plagosën në sulm, sipas guvernatorit të Sevastopolit, Mijaíl Razvozháev.

Përveç kësaj, në jug të Ukrainës, në Mikolaiv, autoritetet flasin për bombardime masive ruse në agim, “ndoshta më intensivet” në pesë muajt e luftës, siç përshkruhet nga guvernatori i rajonit, Vitali Kim. Dy civilë janë vrarë nga sulmet, njëri prej tyre themeluesi dhe pronari i Nibulon, një nga kompanitë kryesore të prodhimit dhe eksportit të grurit në Ukrainë, Oleksiy Vadaturski dhe gruaja e tij.

A2 CNN Livestream

Debat - nga Alba Alishani