Tensionet për reciprocitetin, Kurti: Kur të hiqet barrikada e fundit, shtyjmë vendimin

Publikuar më: 1/8/2022, ora 14:49

Tensionet për reciprocitetin, Kurti: Kur të hiqet barrikada e fundit, shtyjmë vendimin

Publikuar më: 1/8/2022, ora 14:49

Nuk do të lejojmë që bandat kriminale të financuara nga Beogradi të destabilizojnë vendin. Kështu u shpreh kryeministri Albin Kurti, gjatë një konference të përbashkët për shtyp me ministrin e Brendshëm Xhelal Zvelça, lidhur me situatën në veri të Kosovës.

Kurti tha se 9 barrikada ishin vendosur gjithsej në rrugët që çojnë drejt pikave kufitare të Jarinjës dhe Bërnjakut, por se gjatë ditës së hënë kishte filluar tërheqja e tyre. Sipas kryeministrit, dokumentet për hyrje-daljet e shtetasve serbë që hyjnë në Kosovë po lëshoheshin në pikat e tjera kufitare, por ai përsëriti zotimin për shtyrje me 30 ditë të vendimit për reciprocitet kur të hiqej barrikada e fundit dhe lëvizja e lirë të rikthehej.

Ndërsa hodhën poshtë pretendimet për të plagosur me armë zjarri, ministri i Brendshëm Zvelça, sqaroi se 11 qytetarë të Kosovës kishin marrë lëndime të tjera mbrëmjen e së dielës.

“11 qytetarë të lënduar, janë dëmtuar disa vetura të qytetarëve dhe policisë së Kosovës nga struktura kriminale ilegale të armatosura. Kemi nisur hetimet. Disa barrikada janë larguar dhe një pjesë e barrikadave të tjera ka filluar të largohet”.

Kurti bëri përgjegjës për situatën në veri, fushatën dezinformuese të Beogradit ndaj vendimeve të qeverisë për lëshimin e dokumenteve 90-ditore për qytetarët serbë që hyjnë në Kosovë dhe regjistrimin me targat e Republikës së Kosovës, për automjetet që kanë ato të lëshuar nga Serbia. Lidhur me raportimet se shefi i diplomacisë së BE-së, Josef Borrell kishte ftuar në një takim Kurtin dhe Vuçiç në Bruksel, shefi i ekzekutivit të Kosovës u shpreh:

“Me presidentin serb duhej të takoheshim më 19 korrik. Ai kërkoi të shtyhej në fund të muajit gusht. Mbase ka qenë i zënë me përgatitjet e asaj që ndodhi dje. Unë kam shprehur gatishmërinë që kur të na thërrasë Borrell do të shkojë në Bruksel. Një ftesë të tillë për momentin nuk e kemi dhe do të bëjmë të ditur qëndrimin tonë. Jemi për një dialog të mirë parimor, të përqendruar në njohjen reciproke. Dialog për marrëveshje dhe jo dialog për dialog”.

Vendimet për reciprocitetin do të hynin në fuqi më 1 gusht, por mbrëmjen e së dielës qytetarët serbë bllokuan rrugët që çojnë në pikat kufitare të Jarinjës dhe Bërnjakut, ndërsa pati raportime edhe për të shtëna. Tensionet në veri detyruan ambasadorin amerikan në Prishtinë dhe përfaqësuesin e BE-së, Josef Borrell të kërkonin shtyrjen e zbatimit të vendimit me 30 ditë. Misioni i NATO-s në Kosovë, KFOR, tha se është i përgatitur të ndërhyjë nëse rrezikohet stabiliteti në veri të Kosovës.