Tragjedia në Potam, Berisha ngushëllon familjen Avdia: Komisari është një xhelat

Publikuar më: 4/8/2022, ora 11:48

Tragjedia në Potam, Berisha ngushëllon familjen Avdia: Komisari është një xhelat

Publikuar më: 4/8/2022, ora 11:48

Kryetari demokrat, Sali Berisha, shkoi për vizitë ngushëllimi në familjen Avdia, e cila humbi fëmijën në plazhin e Potamit në Himarë, disa ditë më parë. Ai e konsideroi xhelat komisarin që aksidentoi për vdekje vogëlushen.

“Unë erdha për të shprehur ngushëllimet më të ndjera të miat, të familjes sime dhe të PD-së. Erdha si qytetar, për familjen e Jonadës, e cila humbi jetën në një krim horror që ka tronditur thellë çdo shqiptar. Kjo ngjarje ka tronditur çdo njeri. Si ngjarje, si krim i shëmtuar. Duhej të ishe vetëm një individ si ai që e kreu, se kurrë nuk mund të ndodhte një akt i tillë. Një akt i tillë është jashtë përfytyrimit për një qytetar të thjeshtë, po të kryhej nga një qytetar i thjeshtë. Por në fakt, ky akt u krye nga një njeri i qeverisë, ky akt u krye me një mjet monstruoz krimi, siç ishte skafi me 600 kuaj fuqi. Ky akt u krye në distancën më të afërt me rërën, tre-katër metra, në prani të qindra fëmijëve, pushuesve të tjera, që loznin aty. Në këtë aspekt, komisari nuk është asgjë tjetër veçse një xhelat. Krimi është një dëshmi e një shteti të mbushur me të tillë”, tha Berisha.

Ai akuzoi sërish edhe kryeministrin Rama. Sipas tij, Rama duhet të kishte shkarkuar ministrin e Brendshëm.

“Ju i keni vetë rastet. Nuk është rasti për t’i numëruar këtu me radhë vdekjet në stacionet e policisë, vrasjet brenda stacioneve të policisë. Nuk është pra rastësi, që ky xhelat skafist nuk bëri asgjë tjetër, veçse imitoi ministrin e tij me skaf. Edi Rama flet në mënyrën më të përçartur për vampirë politikë dhe mediatikë. Po të hymë në fushën e vampirëve, vampiri dhe xhelati ishte ai që vrau fëmijën pranë babait të tij. Ajo që e bën më të rëndë këtë dramë është se kryeministri i vendit, në vend që të shkarkojë ministrin e familjes, Çuçi, i vërsulet gazetarëve dhe politikanëve dhe i krahason ata me vampirë politikë. Pra, tregon se mban anën e vampirëve të vërtetë. Unë shfrytëzoj rastin të shpreh edhe njëherë ngushëllimet më të ndjera kësaj familjeje fisnike, fisnikë të vërtetë dhe të dënoj me forcën më të madhe këtë akt barbar, të dënoj qëndrimin e papërgjegjshëm të Edi Ramës, ministrave të tij, të cilët konstatojnë apo shohin vampirë tek ata që ngrenë zërin për të dënuar një krim horror, i cili do të trondiste çdo vend të botës”.