Fondet ruse, Kryemadhi: Rama mik i ngushtë i ish-kreut të FBI, ka tentuar ta eliminojë këtë investigim

Publikuar më: 10/11/2022, ora 10:53

Fondet ruse, Kryemadhi: Rama mik i ngushtë i ish-kreut të FBI, ka tentuar ta eliminojë këtë investigim

Publikuar më: 10/11/2022, ora 10:53

Monika kryemadhi mohoi që Lëvizja Socialiste për Integrim të ketë përfituar fonde ruse gjatë drejtimit të saj. E pyetur nga gazetarët, Kryemadhi theksoi se asnjë nga Partia Lirisë nuk është në listën e investigimit amerikan. Sipas saj, nëse do të kishte Rama do të vinte prokurorë për të hetuar çështjen e rublave, por nuk i ka. Ajo akuzoi Ramën për lidhje të ngushta me ish-kreun e FBI-së dhe shkëmbim dhuratash për fondet ruse. Sipas saj, Rama ka tentuar ta eliminojë këtë investigim dhe lajm në media.

“Mendoj që e keni kuptuar Ramën që bërtet: “ujku, ujku dhe çakalli bën kërdinë”. PL dhe ish-LSI nuk kanë marrë asnjëherë fonde ruse. Asnjë nga PL nuk ka dalë në listën e pyetjeve të një hetimi të madh që bëhet sot në SHBA për ish-drejtorin e FBI, që akuzohet drejtpërdrejt si mik i ngushtë i zotit Rama për dhënie e marrie dhuratash që kanë të bëjnë me financimet ruse. Është një investigim i SHBA-së dhe Rama ka bërë shumë për ta eliminuar këtë investigim dhe këtë lajm në media për të shkëputur vëmendjen e opinionit publik, nga varfëria, nga largimi në masë i shqiptarëve. Po të kishte Rama do të vinte nja 10 prokurorë të tjerë për të hetuar çështjen e rublave, por nuk i ka. Sa herë i shtrëngohet litari për inceneratorin e Tiranës nxjerr bllof mediatik”.

Më 14 shtator, Zëri i Amerikës botoi një artikull duke cituar një zyrtar të lartë amerikan, sipas të cilit konfirmohej se Rusia ka dhënë fshehurazi mbi 300 milionë dollarë për parti politike dhe kandidatë në dhjetëra vende, që nga viti 2014. Gjithashtu, ai konfirmoi se presidenti Putin është angazhuar në financim të fshehtë politik në mbarë botën.

Një raport i Komunitetit amerikan të zbulimit ka analizuar financimet e Rusisë “në mbi 24 vende gjatë viteve të fundit në një përpjekje për të manipuluar demokracitë nga brenda”, dhe siç thuhet, Shqipëria është mes këtyre vendeve. “Në Shqipëri, Rusia i dha rreth gjysmë milioni dollarë Partisë Demokratike në 2017 përmes kompanive fantazmë”, citohet nga burimi.

Burimi nuk dha hollësi të mëtejshme për rastin e Shqipërisë, por siç kujton Zëri i Amerikës, gjatë vitit 2017, emri i Partisë Demokratike dhe shifra e përmendur prej 500 mijë dollarësh përkojnë me hetimet që janë hapur në Shqipëri në atë kohë ndaj PD-së bazuar në deklarimet që firma lobuese amerikane “Muzin Capitol Partners” ka raportuar se ka marrë nga PD-ja.

Firma lobuese amerikane kishte deklaruar në vitin 2018 në Departamentin amerikan të Drejtësisë, se ajo kishte marrë gjithsej tre pagesa, në një shumë prej 675 mijë dollarësh, për punën e saj në favor të Partisë Demokratike në vitin 2017.

Në një artikull të gjatë hulumtues rreth këtyre pagesave për Muzin Capitol, revista amerikane Mother Jones ngrinte dyshime se pas një pjese të pagesave të bëra nga kompania “Biniatta Trade LP” me bazë në Skoci, për aktivitete lobimi në favor të PD-së para zgjedhjeve të vitit 2016 në Shqipëri, qëndronin biznesmenë rusë.

Në deklarimet e firmës Muzin për Departamentin e Drejtësisë thuhet se pagesa ishte bërë nga Partia Demokratike. Megjithatë, shifra prej 500 mijë dollarësh figuron në kontratën me Biniatta-n dhe jo me PD-në, sipas Mother Jones.

Ish-kryetari i Partisë Demokratike, Lulzim Basha, ka dhënë shpjegime të ndryshme për pagesën 500 mijë dollarëshe, duke thënë në fillim se ajo u dha nga shqiptaro-amerikanët, por më pas është shprehur se “Çfarë ka bërë lobuesi dhe si e ka bërë lobuesi e di ai. Janë marrëdhënie të firmës Muzin me palë të treta”.

Veç Shqipërisë, sipas burimit të administratës amerikane, në raport përmenden edhe Bosnja dhe Mali i Zi, respektivisht për financimin e fushatës së udhëheqësit të serbëve të Bosnjës, Milorak Dodik për zgjedhjet e vitit 2018 dhe fonde për partinë pro-ruse Fronti Demokratik.