Sondazh: Destinacionet e fundjavave tuaja janë:
  • Bregdeti 100%
  • Zonat malore 0%
  • Qendrat historike 0%

Zyrtari i lartë i SHBA vizitë në Kosovë, Osmani: Marrëveshja me Serbinë të ketë njohjen reciproke

Nga A2 CNN
11 Janar 2023, 19:25 | Kosova
Zyrtari i lartë i SHBA vizitë në Kosovë, Osmani:

Në Prishtinë zbarkoi një delegacion i lartë i Departamentit Amerikan të Shtetit, me një detyrë mjaft të rëndësishme: të nxisin Kosovën dhe Serbinë që të përshpejtojnë hapat për normalizimin e raporteve me një ujdi me njohje reciproke. Këshilltari i lartë i presidentit, Joe Biden, dhe sekretarit Antony Blinken, Drek Chollet, u prit fillimisht nga presidentja e Kosovës, Vjosa Osmani, e cila i përcolli miqve të Uashingtonit këtë porosi.

Më tej, presidentja Osmani bisedoi me zyrtarin e lartë Chollet për zhvillimet e fundit në Kosovë dhe rajon, duke i shpalosur dhe rreziqet që i paraqiten Ballkanit Perëndimor dhe NATO-s nga aleanca e Serbisë me Rusinë.

Presidentja Osmani tha se marrëveshja përfundimtare, e cila duhet ta ketë në qendër njohjen e ndërsjellë, ka për qëllim përmirësimin e jetës së qytetarëve, dhe arritjen e paqes së qëndrueshme dhe afatgjate në rajon.

Presidenca e Kosovës

Delegacioni amerikan i trokiti në derë dhe kryeministrit, Albin Kurti. Por në përfundim të takimit, këshilltari i lartë i Departamentit të Shtetit zgjodhi që të mos zbulonte asnjë fjalë për bisedat e tij me drejtuesit e shtetit të Kosovës. Ndërkohë, ditën e enjte zyrtari amerikan do të vizitojë dhe Beogradin, ku do të takojë presidentin serb, Aleksandër Vuçiç, dhe kryeministren, Ana Brnabiç.

Kjo e fundit është shprehur se do të kërkojë garanci nga Uashingtoni për formimin e Asociacionit të Komunave me shumicë Serbe në Kosovë, ndërsa Vuçiç nuk ka dashur të flasë para takimit. Më herët, DASH njoftoi se Chollet do të bisedojë me liderët e Kosovës dhe Serbisë për integrimin euroatlantik, përfshirë edhe arritjen e një marrëveshjeje për normalizimin e raporteve, të bazuar në njohje reciproke.

Propozimi europian, apo siç njihet ndryshe plani franko-gjerman pritet të jetë në fokus të vizitës. Chollet e ka përmendur atë, si një drejtim të mirë për arritjen e një marrëveshje përfundimtare. Këshilltari i DASH vizitoi më herët gjatë ditës Shkupin, ku konfirmoi partneritetin strategjik me Maqedoninë e Veriut. Kryeministri Dimitar Kovaçevski, tha pas takimit se SHBA mbështet ndryshimet kushtetuese për përfshirjen e pakicës bullgare.

https://a2news.com/2023/01/11/chollet-ne-kosove-perpjekje-per-te-shtyre-perpara-dialogun/
https://a2news.com/2023/01/06/keshilltari-i-larte-i-dash-kosova-dhe-serbia-duhet-te-marrin-vendime-te-veshtira/

A2 CNN Livestream

Dita jonë