Ambasadori britanik në Shqipëri, Alastair King-Smith, është thërritur në Ministrinë për Europën dhe Punët e Jashtme dhe i është dorëzuar një notë verbale, lidhur me deklaratat e ministrit të Emigracionit britanik, Robert Jenrick.
Britaniku ditën e djeshme u shpreh me frazën “të gjejmë shqiptarët, t’i ndalojmë ata, t’i çojmë në aeroport dhe t’i kthejmë në Tiranë”, duke shkaktuar reagimin e ministres së Jashtme, që deklaroi se ishte e tronditur nga gjuha e përdorur kundër shqiptarëve.
Sipas një deklarate të Ministrisë së Jashtme, “përmes kësaj Note, MEPJ paraqiti shqetësimin për deklaratën më të fundit me gjuhë diskriminuese ndaj shqiptarëve nga ana e Ministrit të Shtetit për Imigrimin Robert Jenrick. MEPJ theksoi se kjo retorikë e përsëritur cenon frymën pozitive të bashkëpunimit bilateral të konfirmuar në Deklaratën e Përbashkët mes Kryeministrit të Republikës së Shqipërisë Edi Rama dhe Kryeministrit Britanik Rishi Sunak, në të cilën ndër të tjera ndahet vlerësimi i përbashkët për rolin e diasporës shqiptare në Britaninë e Madhe dhe kontributin e saj të rëndësishëm në kulturën, ekonominë dhe shoqërinë e të dy vendeve”.
MEPJ vijon duke kërkuar “shmangien e kësaj gjuhe urrejtjeje dhe diskriminimi dhe vijimin e dialogut edhe bashkëpunimit konstruktiv për të vënë në jetë angazhimet e ndërmarra, së bashku si dy vende demokratike, partnere e aleate në organizmat ndërkombëtare” dhe kujton se dy vendet “janë angazhuar përmes Deklaratës së Përbashkët që të nxisin më tej marrëdhëniet e bashkëpunimit në një game të gjerë fushash me fokus rininë, inovacionin, turizmin, arsimin dhe investimet strategjike të Mbretërisë së Bashkuar në Shqipëri”. (A2 Televizion)
A2 CNN Livestream
MUND TE LEXONI GJITHASHTU
