Arda Güler është zyrtarisht futbollist i Realit të Madridit. Talenti 18-vjeçar firmosi kontratën që e lidh me “Los Blancos” për 6 vitet e ardhshme. Ylli i Fenerbahçes kushtoi 20 milionë euro, plus 10 milionë të tjera bonus.
Ai udhëtoi menjëherë drejt kryeqytetit spanjoll dhe vizitoi qendrën sportive të Valdebebasit. Për Arda Güler, Reali i Madridit mposhti konkurrencën e shumë klubeve të mëdhenj europianë. Mesfushori, i cili vlerësohet për cilësitë e larta teknike, kërkohej edhe nga Barcelona, Sevilla, Milan, por edhe disa klube të Premier League.
Ai bëhet blerja e gjashtë më e kushtueshme e “merengues”, për futbollistët deri në 18 vjeç. Podiumi është i gjithi brazilian: Rodrygo dhe Vinicius Junior kanë kushtuar 45 milionë euro, ndërsa Endrick 37,5 milionë euro.
Ashtu siç ndodh shpesh me talentët më të mirë në botë, Madridi ishte zgjedhje e parë. Madje, fantazisti turk kërkoi të transferohej menjëherë në “Santiago Bernabeu”. Me afrimin e Güler, praktikisht Reali ka siguruar të ardhmen, pasi ka në kontingjent thuajse një formacion të plotë me futbollistë deri në 23 vjeç. Atyre u shtohen edhe lojtarë si Valverde apo Militão.
Pas blerjes së Jude Bellingham për 103 milionë euro, apo rikthimit të Brahim Diaz nga huazimi te Milani, Arda Güler bëhet përforcimi i radhës i bujshëm nga madrilenët, që në pritje të Kylian Mbappe, deri më tani kanë shpenzuar më pak se 130 milionë euro në merkato. (A2 Televizion)
A2 CNN Livestream
MUND TE LEXONI GJITHASHTU
