Në Libi, një javë pas përmbytjeve që goditën vendin, një familje me pesë anëtarë u nxor e gjallë nga rrënojat nën të cilat ishin bllokuar.

Operacioni i shpëtimit ndodhi në një zonë pranë Dernës. Ndërkohë videoja e një të riu që kërkon të ëmën mes rrënojave dhe arrin të regjistrojë zërin e saj është bërë virale, duke rigjallëruar kështu shpresat për të gjetur të mbijetuar të tjerë në zonat e prekura nga fatkeqësia.

Sakaq, Prokurori i Përgjithshëm ka njoftuar hapjen e një hetimi për shembjen e dy digave që shkaktuan përmbytjen katastrofike në Derna. Sipas rikonstruksionit të parë të fakteve, digat e dëmtuara janë ndërtuar në mesin e viteve 1970 nga një kompani nga Jugosllavia, bazuar në kërkesat e sigurisë së kohës.

Kryebashkiaku i Dernës pranoi se mirëmbajtja e digave nuk është kryer siç duhet që nga viti 2002, ndërsa bombardimet e NATO-s, lufta civile dhe trazirat e mëvonshme vetëm sa e kanë përkeqësuar situatën.

Mbi dy milionë dollarë janë ndarë për mirëmbajtjen e digave dhjetë vjet më parë, por ka dyshime se paratë përfunduan diku tjetër.

Për OKB-në, nëse Libia do të kishte pasur një sistem adekuat të paralajmërimit të motit, tragjedia mund të ishte shmangur, ose të paktën mund të ishte lëshuar një urdhër evakuimi efektiv.