Sondazh: Destinacionet e fundjavave tuaja janë:
  • Bregdeti 50%
  • Zonat malore 50%
  • Qendrat historike 0%

"14 Maji konfirmon de facto ndarjen e PD", Neza: Grupimi Alibeaj del i fundit në zgjedhje

Nga A2 CNN
22 Mars 2023, 22:39 | Politikë
"14 Maji konfirmon de facto ndarjen e PD", Neza:     Grupimi Alibeaj

Kjo është fundjava vendimtare për të mësuar emrat zyrtarë të kandidatëve për kryetarë bashkie që partitë dhe koalicionet do të nxjerrin në 14 maj.

Për analistin Lufti Dervishi, ajo që është e paqartë dhe ndodhet në një lloj presioni është e ashtuquajtura PD-ja zyrtare.

I ftuar në “Debat” në A2 CNN mbrëmjen e së mërkurës, Dervishi thotë se e gjendur përballë kësaj përçarjeje, opozita nuk po mundet as të shfrytëzojë skandalet në të cilat është përfshirë së fundmi qeveria.

“PD-ja zyrtare ka shpallur një pjesë të kandidatëve dhe ndodhet në një presion, që edhe vetë deputetët thonë që nuk kemi pse të kemi kandidatë në Elbasan, Tiranë, Durrës...Në qytetet e mëdha ndjejnë presion sepse nuk mund të bëhet garë për vendin e dytë. Dëmi është bërë tashmë.”

Për të ftuarit në studio, 14 “Maji” në një farë mënyrë “de facto” do të konfirmojë ndarjen e PD-së.

Sa i përket rezultatit në zgjedhje, Sami Neza ka një parashikim aspak optimist për grupimin Alibeaj. Ai pret që kjo pjesë e PD-së të dalë e fundit ose e parafundit në garën e lokaleve të kësaj pranvere.

Sipas Nezës, edhe ato vota që mund të shkojnë në adresë të grupimit të Alibeajt mund të shkojnë “aksidentalisht” për shkak të logos zyrtare të PD-së që do të mbajnë.

“Do të marrin votën e gabuar, ose votën e shpejtë. Sesa vota substanciale, një votë që do t’i identifikonte ata politikisht. Grupimi Alibeaj mund të dalë i katërti ose i pesti e ndoshta më poshtë se koalicioni Patozi-Shehi. Mund të dalin edhe pas Partisë Socialdemokrate, edhe pas Lëvizjes Bashkë, të paktën në Tiranë. Pra mund të dalë i fundit ose i parafundit.”

Deri më tani, dy palët e PD-së kanë mbetur të rezervuara për të folur dhe po presin datën 27 mars. Nga ana tjetër, socialistët duket se do të konfirmojnë 45 kryebashkiakët aktualë.

A2 CNN Livestream

Ditari nga Bruna Çifligu