202-vjetori i Pavarësisë së Greqisë, ambasada organizon pritje në Tiranë

Nga A2 CNN
24 Mars 2023, 14:17 | Aktualitet
202-vjetori i Pavarësisë së Greqisë, ambasada organizon

Me rastin e 202-vjetorit të pavarësisë së Greqisë, Ambasada Helene në Tiranë zhvilloi një pritje ku të pranishëm ishin anëtarë të selive të tjera diplomatike në Tiranë, si dhe politikanë. Ambasadorja e Greqisë Konstantina Kamitsi pohoi marrëdhëniet shumë të mira mes dy vendeve, duke vlerësuar progresin e bërë nga Shqipëria në perspektivën e saj europiane.

“Greqia prej kohësh ka qenë në mbështetje të perspektivës europiane të Shqipërisë. Konferenca e parë ndërqeveritare e cila u mbajt në korrikun e shkuar shënoi një hap domethënës drejt integrimit të Shqipërisë. Fakti që Shqipëria mirëpriti në mënyrë të suksesshme në Tiranë samitin e Bashkimit Europian me Ballkanin Perëndimor, takim ky që zhvillohej për herë të parë jashtë Brukselit, ka një rëndësi të veçantë”, tha ajo.

Diplomatja greke theksoi se të dyja vendet, veç fqinjësisë së mirë janë dhe partnerë dhe aleatë të ngushtë. Ajo theksoi se si minoriteti grek që jeton në Shqipëri dhe komuniteti shqiptar që jeton në Greqi përbëjnë një urë bashkëpunimi mes dy vendeve.

“Ndjenja e fatit të përbashkët dhe e marrëdhënieve miqësore dëshmohet edhe nga shfaqja e përbashkët e solidaritetit në kohë të vështira. Shqipëria ishte i vetmi vend, përveç Qipros, që ndau hidhërimin tonë duke shpallur Ditë Zie kombëtare. Më lejoni ta përfundoj fjalën time duke cituar një politikan, intelektual dhe vizionar të madh, babain e shtetit shqiptar, Ismail Qemali, i cili shkruante në gazetën e tij greko-shqiptare “Shpëtimi i Shqipërisë”, se grekët dhe shqiptarët “ndajnë të njëjtën prerogativë dhe aftësi mendore, për t’u marrë vesh me të gjitha kombet dhe për t’u mësuar me të gjitha vendet dhe të gjitha kushtet klimatike”.

Ambasadorja Kamitsi vlerësoi edhe iniciativën e Shqipërisë për të mbrojtur Vjosën duke e shpallur Park Kombëtar.

https://a2news.com/2022/08/27/kryesisht-ne-greqi-e-turqi-shqiptaret-po-i-kalojne-jashte-pushimet-rekordi-ne-korrik/
https://a2news.com/2022/08/13/turizmi-ne-vend-the-times-shqiperia-ne-nivelin-e-greqise-dhe-kroacise/

A2 CNN Livestream

Ditari nga Erion Dushi