Numri i bizneseve që nuk kanë paguar detyrimet pranë Tatimeve është rritur ndjeshëm, duke bërë që borxhi tatimor të kapërcejë nivelin e 1,3 miliardë euro. Një shifër shumë e lartë, që nëse do të mblidhej, do të ishte oksigjen për financat publike, veçanërisht në këtë periudhë kur institucionet financiare ndërkombëtare kërkojnë heqjen e përjashtimeve fiskale për shumë sektorë dhe kur pritet që brenda pak javëve në Parlament të miratohet taksimi i profesioneve të lira.