Jo vetëm Bundestagu gjerman, por edhe ish-numri 1 i diplomacisë shqiptare Ditmir Bushati, i vë kushte dhe afate Tiranës zyrtare për hapjen e negociatave, të cilat i depozitoi në Komisionin parlamentar për çështjet e integrimit.
Amendamentet e tij propozojnë disa ndryshime në draftin e hartuar bashkërisht nga mazhoranca dhe opozita në Parlament.
“Kuvendi i Republikës së Shqipërisë angazhohet në përfundimin e reformës zgjedhore brenda vitit 2019, në përmbushje të rekomandimeve të OSBE-ODIHR, për të garantuar një proces të lirë, të drejtë dhe demokratik. Kuvendi i kërkon Këshillit të Ministrave të konsolidojë ritmin e reformave, veçanërisht me fokus sundimin e të drejtës dhe liritë e të drejtat themelore. Kuvendi i kërkon Këshillit të Ministrave që të paraqesë brenda datës 31 tetor 2019 planin e punës, metodologjinë, planifikimin e burimeve njerëzore dhe financiare në mbështetje të procesit te bisedimeve për anëtarësim në Bashkimin Europian”.
Bushati nuk ishte prezent në Komision, por burime nga mazhoranca bënë me dije se propozimet e tij shkresore do të reflektohen në projektrezolutë.
Debati publik i Komisionit të Integrimit, u fokusua te nevoja për plotësimin e 9 kushteve të Gjermanisë, për të cilën u angazhua edhe mazhoranca edhe opozita parlamentare.