Emergjenca Covid-19, sa para u shpenzuan për shëndetësinë?

Nga A2 CNN
7 Korrik 2020, 16:46 | Aktualitet
Emergjenca Covid-19, sa para u shpenzuan për shëndetësinë?

Pandemia e koronavirusit dhe situata që duhet të përballonte sektori i shëndetësisë ka dhënë një ndikim të madh ekonomik, duke zënë një pjesë të madhe edhe të shpenzimeve buxhetore.

Të dhënat e Ministrisë së Financave tregojnë se për 5-muajt e parë të vitit, ku përfshihet edhe faza e shpërthimit të virusit në Shqipëri, fondet e shpenzuara nga Ministria e Shëndetësisë kapin vlerën e 26.2 miliardë lekëve apo rreth 40% e totalit të shpenzimeve vjetore për këtë sektor.

Por jo e gjithë kjo shumë është shpenzuar për emergjencën e Covid-19. Në zërat e detajuar, tregohet se rreth 7 miliardë lekë apo 56 milionë euro kanë shkuar për shërbimet e kujdesit shëndetësor dytësor, ku përfshihet trajtimi i pacientëve të shtruar në spitale dhe mbulimi i popullatës me kujdes mjekësor spitalor.

Për të përballuar pandeminë, qeveria u detyrua të akordonte një fond shtesë prej 2.5 miliardë lekë, ekuivalent me 25 milionë dollarë në paketën e parë financiare, të akorduar në muajin prill.

Të dhënat e detajuara të Agjencisë së Prokurimit Publik tregojnë se tenderët e periudhës nga 9 marsi kur shpërtheu pandemia e në vijim kanë qenë për blerje medikamentesh, pajisjesh mjekësore dhe kitesh testimi.

Ndërkaq që në rishikimin që qeveria i bëri buxhetit të këtij viti pak ditë më parë, fondet për shëndetësinë u rritën me 1.3 miliardë lekë.

Edhe pse gjendja e jashtëzakonshme tashmë ka përfunduar, ende nuk jepet një bilanc i saktë sesa i ka kushtuar financave publike pandemia dhe veçanërisht shpenzimet për sektorin shëndetësor. Kjo edhe për faktin se shumë nga nevojat e momentit u përballuan nga dhurimet e ndryshme që u bënë nga institucionet vendase dhe të huaja, kryesisht ambasada amerikane, qeveria kineze dhe Bashkimi Europian, për të cilat Ministria e Shëndetësisë dhe ajo e Financave ende nuk kanë bërë përllogaritjet e sakta.

Sipas këtyre institucioneve, situata është në dinamikë, çka do të thotë se në varësi sesi do të jetë ajo, do të jetë edhe përgjigja me fonde.

A2 CNN Livestream

Ditari nga Bruna Çifligu