Sondazh: Destinacionet e fundjavave tuaja janë:
  • Bregdeti 67%
  • Zonat malore 17%
  • Qendrat historike 17%

Euro në minimum historik, por po mban inflacionin nën kontroll

Nga A2 CNN
3 Korrik 2022, 15:59 | Ekonomi
Euro në minimum historik, por po mban inflacionin nën kontroll

500 euro të dërguara nga një emigrant drejt familjes së tij në Shqipëri, një vit më parë, bashkë me kostot e larta të transfertës, do të përktheheshin në 61 mijë lekë të reja. Sot, kur euro po zhvlerësohet çdo ditë ndaj lekut, e njëjta shumë përkthehet në vetëm 58 mijë lekë.

Në kulmin e një krize çmimesh, kur çdo gjë e veçanërisht ushqimet janë shtrenjtuar, për 1 në 4 familje shqiptare që marrin remitanca, 3 mijë lekë më pak është një goditje e madhe për buxhetin mujor. Goditje edhe për ata eksportues me kapital shqiptar, që kanë edhe forcën e punës që duhet ta paguajnë në lekë, ku kjo rënie e euros i tkurr fitimit.

Por për pjesën tjetër, euro në kuotën 119.1 lekë, 2 lekë më pak brenda një muaji, mund të jetë edhe një bekim.

Inflacioni në vendin tonë u llogarit për muajin maj në 6.7%, ndikuar fort edhe nga karburantet. Ndërsa në eurozonë, norma e fundit e inflacionit shënoi 8.6%. Arsyeja pse Shqipëria ka një rritje më të zbutur të çmimeve, shihet pikërisht edhe tek kursi i këmbimit. Me një monedhë kombëtare më të fortë, fuqia blerëse e importuesve rritet, duke i dhënë atyre mundësinë të mbajnë çmime relativisht më të mira.

Përfituese edhe vetë qeveria, të cilës i ulet pesha e borxhit të jashtëm dhe ka më shumë aftësi paguese për të shlyer interesat e tij dhe këstet e kredive në valutë.

Faktorët që vlerësohet se po ndikojnë në kursin e këmbimit lidhen së pari me rikuperimin e plotë të turizmit, që po sjell flukse të mëdha valute në vendin tonë: 409 milionë euro për tre muajt e parë të vitit. Ndërsa edhe rritja e eksporteve dhe shërbimeve të nënkontraktuara po sjell më shumë të ardhura në valutë të huaj.

Me hyrjen në pjesën e nxehtë të sezonit veror, pritshmëritë e agjentëve të tregut janë për një forcim të mëtejshëm të lekut, diçka që mund të balancohet vetëm nga ndërhyrjet e Bankës së Shqipërisë për blerjen e valutës në ankande, vlerë e parashikuar nga 140 deri në 200 milionë euro përgjatë këtij viti.

A2 CNN Livestream

Debat - nga Alba Alishani