Fondet për rindërtimin, Kuvendi kalon në parim buxhetin 2020 – A2

Fondet për rindërtimin, Kuvendi kalon në parim buxhetin 2020

Buxheti dhe paketa fiskale që e shoqëron atë janë miratuar në parim në seancën plenare të së enjtes, një sesion që ka pasur kryefjalë tërmetin e 26 Nëntorit.
Kryeministri Edi Rama ka deklaruar se qeveria do të përballojë faturën e dëmeve të tërmetit, përmes programit të rindërtimit.
“Do ta programojmë të gjithë procesin sikur mos të marrim asnjë lek nga bota”, deklaroi kryeministri, ndërkohë që ministria e Financave dhe Ekonomisë Anila Denaj shtoi se “ brenda buxhetit të 2020 është menduar një fond për rindërtimin e infrastrukturës, infrastrukturës së strehimit, që do të ketë si burim financiar për vitin 2020 0.4% te produktit të brendshëm bruto, që do t’i bashkohen edhe donacionet ndërkombëtare.
Ndërkaq, Arben Ahmetaj, i cili do të drejtojë Komitetin Kombëtar të Rindërtimit, ka deklaruar se nga dita e premte pritet të nisë në Kuvend edhe diskutimi për zërat në buxhet që do të ndryshohen për të krijuar hapësirë për fondin e rindërtimi, projekt i cili do të nisë zbatimin nga 1 janari i vitit të ardhshëm.
“Në Kuvend do të reflektojmë programin e rindërtimit, dhe se bashku me ministren e Financave do të rialokojmë rreth 6.2 miliardë lekë nga buxheti tradicional”, deklaroi Ahmetaj për A2.
Sipas Ahmetaj, rreth 90% e qytetarëve të prekur nga tërmeti do të sistemohen në banesa deri në fund të vitit 2020. Sipas tij, drafti më i rëndësishëm i financave publike do të përqendrohet tek rindërtimi i banesave në zonat e prekura nga tërmeti, ndërsa nuk do të ketë rritje taksash për qytetarët.