Vaksina kineze Coronavac do të aplikohet te grupmoshat e reja gjatë javës së hapur të vaksinimit. Mbi 150 mijë doza janë planifikuar gjatë 7 ditëve të fushatës dhe një sasi tjetër do të përdoret për të përmbyllur dozat e dyta me të njëjtën vaksinë.
Përgjegjësja e vaksinimit u bën thirrje të rinjve t’i kthehen vaksinimit si e vetmja mënyrë për t’i shpëtuar komplikacioneve nga variantet e reja të koronavirusit.
Krahas vaksinës kineze, në popullatë dhe kryesisht në qendra shëndetësore vijon të aplikohet AstraZeneca, në sasi më të pakta, Sputnik V dhe Pfizer. Edhe pse nga kjo e fundit çdo të hënë vijnë sasi vaksinash, Instituti i Shëndetit Publik nuk e ka ndryshuar rregullin për personat që duhet të marrin vaksinën Pfizer.
Në një kohë që infektimet ditore janë rritur e po ashtu edhe dyshimet për qarkullimin e mutacioneve të reja të koronavirusit, ekspertët theksojnë domosdoshmërinë për marrjen e të dyja dozave anticovid.
Nga fillimi i fushatës janë vaksinuar me të dyja dozat 466 mijë qytetarë. Gjatë javës së hapur ekspertët presin rritje të numrit të të vaksinuarve veçanërisht te moshat e reja që konsiderohen transmetues të lartë të koronavirusit.