Humbja me Vllazninë konfirmoi startin e vështirë të sezonit për Kukësin. Edhe pse skuadra është ndërtuar me ambicie për titullin dhe janë afruar emra si Abazaj apo Gavazaj, veri-lindorët pësuan humbjen e tretë në shtatë ndeshje.
Një ecuri larg pritshmërive dhe e
papranueshme për Presidentin Safet Gjici: “Nuk e prisnim sepse ekipin e kemi.
Duhet që stafi teknik të reagojë, bashkë me lojtarët. Prodhohet loja, shkohet
te porta, por nuk shënohet. Janë shumë 3 humbje për Kukësin në kaq javë”.
Kukësi ndodhet në vendin e shtatë, vetëm 2
pikë larg kreut. Edhe pse e pranon se janë brenda objektivit, trajneri Shpëtim
Duro thekson se nëse ecuria nuk ndryshon, nuk do t’i bëhet barrë klubit: “Nëse
Kukësi do të dalë jashtë objektivave, unë nuk ia lejoj vetes që të vazhdoj. Unë
nuk i bëhem barrë klubit. Por, të gjitha skuadrat janë me 1 ose 2 pikë diferencë
dhe jemi në luftë”.
Në fillim të edicionit, pakkush do ta mendonte
Vllazninë në krye të kampionatit. Një skuadër e ndërtuar mes problemeve dhe
vonesave, ku po befason braziliani Hygor, ndërsa kapiteni Gilman Lika është
lideri i padiskutueshëm, që tashmë kërcënon Partizanin pas pauzës për ndeshjet
ndërkombëtare.
“Objektivi nuk është
titulli kampion. Por, unë e kam thënë që kemi grup të mirë që nuk i frikësohet
askujt. Ndeshjen me Partizanin do ta përgatisim për ta fituar”, tha Lika.