Identifikimi biometrik, tenderi në pikëpyetje, vetëm një kompani shfaq interes

Identifikimi biometrik për zgjedhjet parlamentare të 25 prillit është futur në një spirale të rrezikshme. Në skadim të afatit për kompanitë që do të shprehnin interesin për tu bërë pjesë e tenderit, në adresën e KQZ-së u paraqit vetëm një ofertë zyrtare, ndërsa 5 të tjera u tërhoqën nga gara.
“Paraqitja e vetëm një oferte e ngushton mundësinë duke pasur parasysh që kemi fazën e kualifikimit. Do të presim të shohim nëse kjo kompani i plotëson kriteret ligjore dhe më pas do të bëhet vlerësimi i ofertës teknike. Kështu që patjetër, nëse do të kishte një numër më të lartë të kompanive do të rritej mundësia që mos të dështonte në këtë fazë procesi”, thotë Lealba Pelinku, kryetarja e Komisionit Qendror të Zgjedhjeve.
Pavarësisht se në garë është vetëm një kompani, kryetarja e KQZ-së shprehet se institucioni nuk është në fazën për të pasur një plan B në rast se procedura e prokurimit nuk rezulton e suksesshme.
“Në momentin që kompania do të rezultojë si kompani që i përmbush kriteret nga KQZ , do të hyjmë në fazën e negocimit e cila do të përfundojë me lidhjen e kontratës. Kështu që tashmë nuk kam akoma më shumë arsye që të flas për një plan B”, thotë ajo.
Kompania e cila synon të bëj identifikimin e zgjedhësve në 25 prill është SmartMatic dhe ka kërkuar rreth 16 milion euro për implementimin e identifikimit biometrik në të gjitha qendrat e votimit.
Por kjo kompani nuk është e panjohur në Shqipëri. Në datën 18 nëntor 2019 pranë Komisionit të Posaçëm Parlamentar për Reformën Zgjedhore kjo kompani ka bërë demonstrimin e pajisjeve teknologjike, qoftë për identifikimin ashtu edhe për votimin dhe numërimin elektronik.
E njëjta kompani ka zhvilluar gjithashtu takime me partitë kryesore politike, si edhe procesin zgjedhor brenda vetë PS-së.