Gazetari i A2, Jul Kasapi, deklaroi në studion e “Absolut 4” në A2 se për ngjarjen e Velipojës, ku u vranë 4 persona për hapësirën e plazhit, policia ka përgjegjësinë e saj dhe, sipas tij, ministri i Brendshëm nuk mund të thotë se vrasja mes fqinjëve natën nuk parandalohet dot.
“Unë vazhdoj t’i mëshoj historisë së vetting-ut. Pjesa më e madhe e drejtuesve të lartë të Policisë së Shtetit nuk e kanë kaluar vetting-un. Në rastin e Velipojës, policia ka përgjegjësinë e saj, pasi ka për detyrë që të parandalojë vrasje. Nuk mund të dalë ministri i Brendshëm dhe të thotë se nuk mund të parandalohet një vrasje mes fqinjësh në orën 1 të natës”, u shpreh Kasapi.
Sipas tij, “ai konflikt kishte dy ditë që vijonte dhe qytetarët e kishin lajmëruar policinë”.
“Policia dhe prokuroria mund të nisë hetime kryesisht për ngjarje të tilla”, theksoi Kasapi.