Kërcënimi për vizat, analistët: Përgjigjja e presidentes Osmani, gjuhë jo diplomatike

Nga A2 CNN
3 Shtator 2023, 11:40 | Kosova
Kërcënimi për vizat, analistët: Përgjigjja e

Gjuhë jo të përshtatshme, aspak diplomatike, e quajnë analistët, përgjigjen e presidentes Osmani, ndaj paralajmërimit të homologut të Parisit, për rishqyrtim të politikave për vizat, nëse Kosova dhe Serbia nuk bëjnë përpjekje për normalizim të marrëdhënieve. Gazetarë e analistë thonë se do dëshironin që presidentja e tyre të ishte më e matur në deklaratat e saj.

“Nuk mendoj se është mënyra e duhur, pasi Kosova nuk është ndonjë vend i fortë as strategjikisht, ekonomikisht apo ushtarakisht që të mbërrijë me kërcënu një shtet siç është Franca, i cili është një prej vendeve kryesor evropian. Nuk është gjuhë diplomatike që presidentja duhet me përdorë ndaj presidentit Macron apo Bashkimit Evropian. Mirëpo është e vërtet se nëse Bashkimi Evropian merr vendim dhe shfuqizon vendimin për liberalizimin e vizave për Kosovën, do ta dëmtonte dialogun. Por nuk mendoj se do të shkojë deri tek ajo pikë”, tha analisti Arton Demhasaj.

Gjithsesi sipas tyre, deklarata e Presidentit Macrondukej më shumë si ultimatum ndaj Kosovës e Serbisë, për t’ju rikthyer dialogut, një shenjë kjo që edhe njëherë tregoi se Bashkimi Europian, është lodhur nga Kurti e Vuçiç, e tani është koha që të dy palët, të marrin seriozisht këtë angazhim, siç shkruhet e bardha në të zezë në marrëveshjen bazë të Brukselit e Ohrit. 

“Mbase Bashkimi Evropian duhet t’i ketë parë pasojat e politikave të tij të gabuara, të pasuksesshme dhe pa efekte deri tani. Andaj mbase do të duhej të ketë politika më shtrënguese, sidomos ndaj Serbisë. Pasi tani për herë të parë Serbia përmendet si faktor që mund të sanksionohet ashtu siç është sanksionuar Kosova”, deklaron analisti Mazllum Baraliu.

Në fund të gushtit, teksa mblodhi në një takim ambasadorët francezë, presidenti Macron ishte i drejtpërdrejtë kur tha se vendi i tij do t’i rishikojë zotimet që i ka bërë për çështje ekonomike dhe politika të vizave për Kosovën dhe Serbinë, nëse ato nuk sillen me përgjegjësi në dialog. Në reagimin e parë pas këtij paralajmërimi, presidentja Vjosa Osmani tha se një veprim i tillë, do ta vriste dialogun.  

Do të informohesh i pari?
Shkarko aplikacionin tonë:
Android ~ iOS

A2 CNN Livestream

Dita jonë 2024