Mëngjesin e sotëm në ambientet e SPAK është paraqitur rektori i Universitetit të Mjekësisë, njëherësh shefi i Kirurgjisë në QSUT, Arben Gjata.
Mësohet se Gjata është paraqitur në ambientet e Prokurorisë së Posaçme në zbatim të masës së sigurisë “detyrim paraqitje”, të caktuar nga GJKKO për hetimet në kuadër të koncensionit të sterilizimit.
Sipas masës së sigurisë së vendosur nga GJKKO procedura e përcakton se Gjata duhet të paraqitet në SPAK, të premten e parë dhe të premten e fundit të çdo muaji.
Rektori i Mjekësisë në dhjetor të vitit 2015, kohë kur u nënshkrua kontrata midis Ministrisë së Shëndetësisë dhe kompanisë koncesionare “SaniService”, ka pasur detyrën e anëtarit të komisionit të vlerësimit të koncesionit të sterilizimit.
Ndërkohë nga SPAK për këtë çështje pritet të pyetet dhe ish-ministri i Shëndetësisë asokohe, Ilir Beqja. Më herët ai ka deklaruar se koncesioni i formës partneritet publik-privat të sterilizimit, ka qene i suksesshëm dhe ka ulur ndjeshëm infeksionin spitalor dhe me afro dy ditë qëndrimin e një pacienti në spital.
Edhe kryeministri Rama ka deklaruar se sterilizimi nuk do të ndalet si shërbim, duke u distancuar nga abuzimet me kontratën e ngritjes së këtij partneriteti publik privat. Sipas tij çdo njeri që ka abuzuar me pushtetin duhet të përballet i vetëm me drejtësinë. (A2 Televizion)
A2 CNN Livestream
MUND TE LEXONI GJITHASHTU
