Sondazh: Sa ju kanë funksionuar dietat e shpejta pranverore?
  • Gjithmonë 18%
  • Me raste 45%
  • Asnjëherë 36%

Koronavirusi në Shqipëri, ndërron jetë një tjetër person, shkon në 277 numri i të prekurve

Nga A2 CNN
2 Prill 2020, 11:25 | Aktualitet
Koronavirusi në Shqipëri, ndërron jetë një tjetër

277 janë të prekurit nga koronavirusi në vendin tonë, mes tyre 16 viktima. Një pacient 78-vjeçar nga Durrësi humbi jetën gjatë 24 orëve të fundit.

Në Spitalin Infektiv është rritur numri i pacientëve të shtruar. Nga 81 që ndodhen në këtë shërbim, 8 janë në terapi intensive. Mes 277 të infektuarve, 8 janë fëmijë, që fatmirësisht janë në gjendje të stabilizuar. Autoritetet deklarojnë se testimet kryhen vetëm për një grup të caktuar personash: “Sot kryejmë tampon vetëm për personat që kanë shenja klinike, për ata që janë në kontakt me persona pozitivë, dhe që janë mbi moshën 60 vjeç”.

Por, a mund të kryhen teste për Covid-19 edhe në spitalet private në vend? “Aktualisht, i vetmi laborator i certifikuar për kryerjen e tamponëve është laboratori i virologjisë pranë ISHP”, ka thënë Rovena Daja, epidemiologe pranë ISHP-së.

Njoftimi i plotë i Ministrisë së Shëndetësisë

COVID-19/ Ministria e Shëndetësisë: 18 raste të reja, shkon në 277 numri i të prekurve

Ndërron jetë 78-vjeçari nga Durrësi, viktima e 16 në Shqipëri. 9 të shëruar gjatë 24 orëve të fundit. Shkon në 76 numri i të shëruarve

Në vijim të komunikimit të përditshëm, ju bëjmë me dije se vazhdon puna në terren për identifikimin e rasteve të reja dhe gjurmimin e kontakteve të rasteve të konfirmuara pozitive.
Epidemiologët në çdo njësi vendore të kujdesit shëndetësor nga veriu në jug, janë në terren dhe po bëjnë një punë të jashtëzakonshme për të identifikuar në kohë kontaktet, pas verifikimit të rasteve të dyshuara.
Ju bëjmë me dije se mëngjesin e sotëm ka ndërruar jetë një pacient 78- vjeçar nga Durrësi i konfirmuar me COVID-19. 78-vjecari ishte në gjendje të rëndë, i intubuar prej 3 ditësh dhe pavarësisht përpjekjeve të stafit mjekësor fatkeqësisht nuk arriti të mbijetojë.
Ministria e Shëndetësisë dhe Mbrotjes Sociale i shpreh ngushëllimet familjes së të ndjerit.
Deri tani janë 16 persona që kanë ndërrur jetë nga COVID-19 në Shqipëri.

Në 24 orët e fundit janë testuar 96 persona të dyshuar, prej të cilëve janë konfirmuar 18 raste të reja me COVID-19.
Deri në këto momente janë testuar 1919 raste të dyshuara dhe prej tyre janë të konfirmuar pozitivë me COVID-19, 277 raste, nga të cilët vetëm 8 janë femijë. Mosha mesatare e rasteve pozitve me COVID-19 është 50 vjeç.
Lajmi i mirë është që gjatë 24 orëve të fundit kemi 9 pacientë të shëruar duke e çuar numrin e të shëruarve nga COVID-19 në 76.
Sot janë testuar edhe 9 personel shëndetësor të cilët kanë rezultuar negativë.
Në shërbimin infektiv aktualisht janë 81 të shtruar. 8 prej tyre janë në terapi intensive ndërsa 4 nga këta janë të intubuar. Pjesa tjetër e të shtruarve në pavion janë në gjendje të stabilizuar deri në këto momente. Ndërkohë në spitalin COVID 2 “Shefqet Ndroqi” kemi 1 pacient të shtruar.
Harta e të prekurve nga COVID-19 zgjerohet në Tiranë, Durrës, Kavajë, Lezhë, Has, Elbasan, Shkodër dhe Pukë, përveç rasteve të zbuluar për të cilat po kryhet hetimi epidemiologjik dhe ku po punohet me shumë intesitet nga epidemiologët për gjurmimin e kontakteve të rasteve pozitive dhe ndërprerjen e zinxhirit të transmetimit të infeksionit.
Shpërndarja gjeografike e rasteve pozitive, është si vijon:

  • Tiranë 143 raste
  • Durrës 30 raste
  • Lushnje 4 raste
  • Elbasan 8 raste
  • Fier 23 raste
  • Kavajë 6 raste
  • Rrogozhinë 2 raste
  • Korçë 16 raste
  • Vlorë 5 raste
  • Shkodër 10 raste
  • Lezhë 6 raste
  • Berat 1 rast
  • Has 8 raste
  • Krujë 5 raste
    -Tropojë 4 raste
  • Pukë 4 raste
  • Mirditë 2 raste

Ministria e Shëndetësisë dhe Mbrojtjes Sociale i kërkon qytetarëve të vijojnë të respektojnë masat e distancimit social.
Ministria e Shëndetësisë apelon qytetarët të telefonojnë në numrin 0800 40 40 për përfitimin e barnave me rimbursim dhe cdo pyetje për COVID-19 ndërsa në numrin e urgjencës kombëtare 127 duhet të telefonojnë nëse dyshojnë se kanë shenja të COVID-19.

A2 CNN Livestream

Dita jonë