Të frenosh shqiptarët
të ikin jashtë vendit duket një mision i pamundur. Përtej politikave të qeverisë,
Shqipëria është përballur me një numër në rritje të azilkërkuesve në vitin që lemë
pas. Shqetësues është fakti se është rritur ndjeshëm numri i azilkërkuesve nga
radhët e shtresës së mesme.
I njëjti problem u ngrit edhe në mbledhjen e Këshillit Kombëtar të Integrimit, ku
zv/ministrja e Brendshme, Rovena Voda, pranoi se numri i shqiptarëve që kërkojnë
azil në vende të tjera është në trend rritës.
“Shifrat e 2019, për të cilat ne i referohemi edhe
Eurostat-it, për momentin, duke futur edhe muajin tetor, rritja deri tani nuk është
16% por 10% dhe lajmet e mira që vijnë është që për muajin nëntor dhe dhjetor
ka rënie sërish të numrit të azilkërkuesve”, u shpreh zv.ministrja Voda.
Kërkesat e shumta për azil nga Shqipëria, kanë qenë argumenti më i fortë që
Presidenti Emanuel Macron ka përdorur për të kundërshtuar hapjen e negociatave
për Shqipërinë drejt BE. Tirana zyrtare ka një tjetër shpjegim se pse shqiptarët
i drejtojnë sytë nga Franca.
“Me Francën, sigurisht që kemi ende disa problematika, por pa dashur absolutisht të justifikoj apo të justifikohem këtu para jush, Franca është një vend që ka një legjislacion “miqësor” lidhur me çështjet e azilkërkimit dhe ajo që ne kemi kërkuar gjithmonë nga ata është ndarja e informacionit dhe të qenurit transparentë me ne”, shtoi Voda.
Qeveria thotë se është angazhuar me një seri strategjish për punësimin veçanërisht
të të rinjve
në vend e po aq me politikat e punësimit për të rikthyerit që iu është refuzuar
azili. Por mesa duket kaq nuk mjafton. A2 pyeti disa qytetarë në kryeqytet
nëse e kanë menduar ikjen nga Shqipëria.