Sondazh: Destinacionet e fundjavave tuaja janë:
  • Bregdeti 67%
  • Zonat malore 17%
  • Qendrat historike 17%

Nuk ka pushime në Europë, BE qëndron e mbyllur pas 1 korrikut, ja kush mund të udhëtojë

Nga A2 CNN
1 Korrik 2020, 10:36 | Bota
Nuk ka pushime në Europë, BE qëndron e mbyllur pas 1 korrikut, ja

Sot duhej të ishte dita kur mund t’i riktheheshim planeve për udhëtime në vendet e Bashkimit Europian. Më 15 qershor Komisioni Europian doli me një rekomandim të qartë për hapjen e kufijve të jashtëm për vendet e Ballkanit Perëndimor nën argumentimin se rajoni kishte një situatë të ngjashme apo me të mirë se sa ajo në shtetet anëtare.

Por në dy javë u përmbys gjithçka, situata epidemiologjike u përkeqësua dhe Brukseli bëri një hap prapa.  Nga vendet e Ballkanit Perëndimor, prej 1 korrikut e për të paktën dy javët në vazhdim do të mund të udhëtojnë vetëm shtetasit e Malit të Zi dhe Serbisë, vende që po raportojnë shifra më të ulëta ditore të rasteve me Covid-19.

Beogradi u bë pjesë e listës së 14 vendeve të sigurta, pavarësisht pretendimeve të argumentuara se autoritetet atje po fshehin bilancin real. Ndërkaq, sipas rekomandimit të Bashkimit Europian, shtetasit shqiptarë, ata të Kosovës e Maqedonisë së Veriut, nuk mund të udhëtojnë drejt shteteve anëtare.

Megjithatë nuk do të preken nga kufizimet kategori të caktuara; të tillë si shtetasit e Bashkimit Europian dhe familjarët e tyre, ata që kanë leje qëndrimi në shtetet anëtare dhe personat që duhet të kryejnë udhëtime për qëllime thelbësore.

Lista do të rishikohet çdo 14 ditë; e në varësi të situatës me pandeminë mund të hiqen e shtohen vende të reja.

Rekomandimi i Këshillit Europian nuk është detyrues e mbetet në dorë të shteteve anëtare ta implementojnë ose jo atë, e megjithatë duket askush nuk është i gatshëm të rrezikojë edhe nëse kjo do të nënkuptonte shpëtim të industrisë së turizmit.

Greqia, e cila një ditë para se Bashkimi Europian të konfirmonte listën e vendeve të sigurta, u shpreh e gatshme të hapte kufijtë për fqinjët shqiptar, pak orë më vonë ndryshoi qëndrim duke saktësuar se do të jenë vetëm shtetasit me leje qëndrimi dhe ata që kanë arsye thelbësore që do të kalojnë kufijtë helenë.

A2 CNN Livestream

Debat - nga Alba Alishani