Me 2 vota abstenim dhe në mungesë të disa deputetëve, Komisioni i Sigurisë miratoi aktin normativ të qeverisë, të njohur si Anti-KÇK.
Zv/ministrja e Brendshme, Rovena Voda tha se Operacioni Forca e Ligjit përbëhet nga elementët më të mirë që janë në Policinë e Shtetit dhe për hetime pasurore do të kërkohen ekspertë të tjerë, të cilët do të ndikojnë në buxhetin e shtetit, ndaj kostoja nuk mund të llogaritet tani.
Ajo paraqiti një shembull të mosfunksionimit të drejtësisë: “Nga 1 milion euro pasuri të sekuestruara në vitin 2013, në 91 milionë euro në vitin 2019, gjykata ka konfiskuar vetëm 30 mijë euro”.
Përfaqësuesi i Ministrisë së Drejtësisë tha se në listën e mbyllur të OFL-së janë personat e dënuar, të cilët dyshohet se kanë vendosur pasuri të paligjshme, ndërsa garantoi se nuk preken të drejtat e njeriut.
Kryetarja e Komisionit të Sigurisë kishte një sugjerim për dy zyrtarët: “Puna juaj nuk duhet të mjaftohet vetëm me goditjen e pasurisë të personave të dënuar këtu e 20 vite më parë, duhet të kemi edhe persona që janë dënuar afër”.
Në lidhje me afatin e efektshmërisë së ligjit përtej 2020-s, Voda tha se policia po krijon sektorë të rinj kundër korrupsionit dhe krimit ekonomik, por Felaj i kujtoi strukturat e reja të drejtësisë.
Pas diskutimeve në komision, akti normativ do të dërgohet për votim në Parlament.