Pavijoni shqiptar “Në shtëpinë tonë” në Bienalen e Venecias

U hap në Bienalen Ndërkombëtare të Arkitekturës, në Venecia pavijoni shqiptar, nën titullin “Në shtëpinë tonë”. Shqipëria përfaqësohej në këtë edicion të shtyrë për shkak të Covid 19, nga katër vajza arkitekte: Fiona Mali, Irola Andoni, Malvina Ferra dhe Rudina Breçani. E pranishme në ceremoninë e hapjes ishte Ministrja e Kulturës, komisionere e këtij pavijoni, Znj.Elva Margariti. E nderoi këtë ceremoni edhe prezenca e Presidentit të Bienales, Z. Roberto Cicutto, i cili e vlerësoi së tepërmi praninë shqiptare në këtë edicion të pazakontë. Si ish-drejtues i Cinecita-së, Cicutto u ndal edhe tek ajo copëz Shqipërie që vjen bashke me filmat, që janë përzgjedhur të jenë pjesë e pavijonit. Katër arkitektet shpjeguan për të pranishmit konceptin e tyre, që në fakt është e shkuara jonë e përbashkët.