Mesazhi i ambasadores amerikane Yuri Kim për testin e së vërtetës ishte i qartë. Poligrafi do të zgjedhë njerëz me integritet.
“Ato janë një tjetër armë në arsenalin e qeverisë shqiptare për të zbuluar dhe larguar individët e korruptuar nga radhët e ligjzbatuesve”, është shprehur Yuri Kim.
Një prej këtyre 8 kandidatëve do të drejtojë Byronë Kombëtare të Hetimit ose pagëzuar ndryshe si FBI-ja shqiptare. Prej 4 ditësh, ata i janë nënshtruar vlerësimit të aftësive fizike, arsyetimit logjik dhe aftësive për të shkruar raporte.
Njëri pas tjetrit kandidatët u janë përgjigjur pyetjeve të poligrafit dhe ata që do të kualifikohen do të mund të mbërrijnë në fazën e intervistimit final nga kreu i SPAK.
Pak ditë më parë, Ambasada amerikane garantoi se po mbikëqyr me rreptësi procesin e përzgjedhjes së kandidatëve. Për këtë, 5 punonjësve të Shërbimit për Çështje të Brendshme dhe Ankesat u trajnuan nga ekspertë amerikanë për të përdorur poligrafin ose, siç njihet ndryshe, makinën e së vërtetës.
Por edhe pas përzgjedhjes së kreut të BKH, struktura duhet të plotësohet me 60 anëtarë të tjerë në mënyrë që të fillojë punën.