Ish-ministri i Jashtëm, Ditmir Bushati, foli në seancën e sotme në Kuvend për raportin e një dite më parë të Komisionit Europian, duke u shprehur se tashmë është koha për mirëkuptim politik.
“Ky raporton konfirmon edhe njëherë tjetër rolin e pazëvendësueshëm të Shqipërisë në rajon. Raporti ofron një pasqyrë të qartë të të gjitha arritjeve, por edhe një pasqyrë për të mos përsëritur gabimet e së kaluarës dhe për të mos rënë në kurthin e vetëkënaqësisë. Reagimet e opozitës ishin pasqyre e kulturës së dëshpërimit. Kam përshtypjen që harrojnë.
Kjo është arsyeja që ne dhe 90 përqind e shqiptarëve kërkojnë Bashkimin Europian. Kjo është arsyeja që ne e shtrimë dorën e bashkëpunimit në kuadër të reformës zgjedhore, si ndaj opozitës parlamentare ashtu edhe ndaj opozitës politike. Kjo është arsyeja që ne socialistët e shtrijmë dorën e bashkëpunimit për të kapërcyer çdo dasi politike sepse për ne është më e rëndësishme Shqipëria. Nuk u desh të dilte Theresa May të na kujtonte se ekziston kompromisi nuk është fjalë e pisët, por sepse ne jemi të ndërgjegjshëm që Shqipëria europiane kërkon një përgjegjësi tjetër, tha Bushati.