Janë zgjuar të rrethuar nga policia dhe të terrorizuar nga dhuna e përmbaruesve për t’u shembur shtëpinë.
As të vegjlit e kësaj shtëpie nuk i kanë shpëtuar tronditjes e skenave që dhe në filma nuk do donin t’i shihnin.
Përtej fuqive të një gruaje shtatzënë, Sajda përpiqet të shpëtojë strehën e saj, shtëpinë ku është martuar dhe pret fëmijën e dytë.
Nuk është kundër prishjes, por kërkon që pronari i tokës të respektojë marrëveshjen e bërë me familjarët, pasi palët hoqën dorë nga gjyqi.
Ndryshe nga e përditshmja e saj si punonjëse policie, Blerta Dervishi sot është përballë kolegëve. Ajo proteston për ndërhyrjen e padrejtë të pronarëve të tokës që, sipas saj, rrezikon t’i lërë pa shtëpi.
Binjakët e saj nuk fshehin dhimbjen e as tronditjen që përjetuan para shtëpisë. Thirrjet e familjarëve dhe britmat e fëmijëve të kësaj shtëpie në një nga zonat më të lakmuara për ndërtime në Tiranë, janë protesta e radhës për drejtësi të munguar.