Gjithçka kishte shkuar mirë. Mesazhi iu drejtohej prindërve të cilët qëndronin prej së paku tre orësh në pritje, teksa fëmijët e tyre i nënshtroheshin provimit të parë të Maturës Shtetërore.
Rënia e ziles shënoi edhe fundin e 2 orëve e gjysmë, për pjesën më të madhe kohë e mbushur me emocione.
Në gjithë vendin ishin rreth 30 mijë gjimnazistë që zhvilluan provimin e parë të Maturës Shtetërore, në gjuhë të huaj. Ndryshe nga vitet e shkuara, testi që zgjati për 2 orë e gjysmë u zhvillua në salla të hapura, të cilat u mbikëqyrën nga 7 mijë e 800 mësues në të gjithë vendit dhe nën mbikëqyrjen e kamerave.
“Ajo që është pozitive është që ambienti i hapur krijon një lloj sigurie dhe garancie pasi do të mbikëqyret nga një numër i madh mësuesish dhe jo vetëm 15 vetë. Pjesa e kamerave nuk mendoj se është problem. Do të jetë thjesht për të mbikëqyrur administratorët”, tha Teuta Braçaj, drejtoresha e shkollës, “Petro Nini”.
Megjithatë, masat e reja nuk frenuan fenomenin e vjetër të daljes së tezës. Teksa kishin kaluar më pak se 30 minuta nga nisja e provimit, në rrjetet sociale doli dhe qarkulloi teza e provimit të Anglishtes.
Pas gjuhës së huaj, provimi i dytë i Maturës Shtetërore do të jetë Gjuha shqipe dhe Letërsia, i cili do të zhvillohet më 7 qershor, teksa në datë 13 qershor do të mbahet provimi i Matematikës.
Lënda me zgjedhje është dhe provimi i fundit, i cili do zhvillohet në datë 19 qershor. Si çdo vit, është vendosur që provimet të kenë largësi afërsisht një javë nga njëri-tjetri. (A2 Televizion)
A2 CNN Livestream
MUND TE LEXONI GJITHASHTU
