PS lë në pritje komisionin hetimor për ish-Ministrin

Ish-kolegët e tij socialistë, kanë vendosur ta lënë në pritje Saimir Tahirin. Nga konferenca e kryetarëve ata nuk dolën të bindur për të ngritur një komision të ri hetimor “Tahiri 2”.
Burimet nga mazhoranca I thanë A2 CNN se ata janë parimisht dakord me kërkesën e opozitës, por duan kohë që të njihen me të.
Të njëjtat burime thonë se demokratët kanë ndryshuar gati 90% të objektit të hetimit, duke shtrirë periudhën e hetimit nga 1 janar 2014, deri më 1 janar 2018, ndërkohë që Tahiri prej marsit 2017 nuk ka qenë më Ministër i Brendshëm.
Për sa më sipër, socialistët i dhanë vetes kohë për të krahasuar dy kërkesat. Kjo nuk u prit aspak mirë nga opozitarët, që folën për zvarritje të hetimit parlamentar.
Komisioni Hetimor “Tahiri 1”, u mbyll më 6 dhjetor 2018, pa ndonjë rezultat konkret. Mbetet për t’u parë nëse komisioni ‘’Tahiri 2’’ do të jetë ndryshe.

Shkarkoni aplikacionin e A2