Gjermania po njeh një shtim të rëndësishëm dhe shqetësues të shifrave të infeksioneve nga COVID-19. Një nga shkaqet kryesore të rritjes është deklaruar si rikthimi në territorin gjerman i turistëve ose i emigrantëve, kryesisht nga Ballkani.
Aurora Meta Dollenberg, nënkryetare e Federatës së Mjekëve Shqiptarë në Diasporë, shpjegon për A2 këtë risi për një vend që mbahej si kampion në luftën kundër pandemisë.
“Ardhja e pushuesve ka qenë arsyeja kryesore, Kosova dhe vendet e tjera të Ballkanit, por i shtohen edhe Polonia dhe Spanja, pra është një problem i verës ai që po çon edhe Gjermaninë në kaos”, thotë ajo.
Sipas Dollenberg, “ardhjet e infeksioneve nga trojet fqinje, përfshirë ato shqiptare, kanë prishur humorin e institucioneve gjermane mbi kontrollin e pandemisë. Kemi marrë letra jo shumë të këndshme mbi kontrollet që duhet të bëjmë për ata që kthehen nga trojet shqiptare”, pohon mjekja.
Ndërkohë, Kosova ka rezultuar si vend i origjinës më i nxehtë si vatër infeksioni në Gjermani, dhe mjekja që ushtron në Hamburg specifikon se “në qoftë se vendi i origjinës është Kosovë, ka një rigorozitet shumë të lartë për vazhdimin e jetës publike. Duhet të bëjnë tamponin në aeroport, por edhe po të jenë negativë duhet të bëjnë të paktën 2 javë karantinë. Numri i shqiptarëve që vijnë nga Kosova të infektuar me COVID-19 është 100-fish më shumë se ato që vijnë nga Shqipëria, rreth 1100 kundër 86, ndoshta kriza është menaxhuar më mirë në Shqipëri sesa në Kosovë”.