Sondazh: Destinacionet e fundjavave tuaja janë:
  • Bregdeti 60%
  • Zonat malore 20%
  • Qendrat historike 20%

Shteti si aksioner, vetëm 155 mijë euro fitime të arkëtuara gjatë këtij viti

Nga A2 CNN
17 Dhjetor 2022, 14:20 | Ekonomi
Shteti si aksioner, vetëm 155 mijë euro fitime të arkëtuara

Shteti nuk është shumë fitimprurës kur vjen puna tek kompanitë ku është aksioner, qoftë 100% apo pjesërisht. Kjo shpjegohet me faktin se sektorët ku shteti është i përfshirë, kanë kryesisht nevojë për subvencione, ndërsa të tjera kompani publike i përdorin të ardhurat për të riinvestuar, si në rastin e energjisë elektrike.

Të dhënat e Ministrisë së Financave tregojnë se deri më tani për 11 muajt e vitit, dividenti, apo fitimi i shpërndarë sipas pjesës së aksioneve që zotëron qeveria, kapën një vlerë prej 17,75 milionë lekësh. Kjo përkthehet në një shumë modeste prej 155 mijë eurosh.

Në krye të listës dhe me pjesën më të madhe të dividentit të shpërndarë renditet një fabrikë e prodhimit të pijeve freskuese, ku shteti është 2,66% aksioner. Më pas vjen shtypshkronja e letrave me vlerë, Regjistri Detar Durrës, Albpetrol sh.a, si dhe Albafilm.

Edhe pa u mbyllur viti, kjo shumë është gjithsesi më e madhe se vitin e kaluar, kur të ardhurat nga dividenti ishin 14,94 milionë lekë, por ndjeshëm më e ulët se në vitin 2020 dhe 2019, kur edhe Autoriteti i Aviacionit Civil, Albcontrol, Enti Rregullator i Ujit dhe Operatori i Sistemit të Transmetimit, kontribuan në një divident total prej rreth 2,3 milionë eurosh në vit.

Fitimet në rënie nga këto kompani ku shteti është aksioner, tregojnë se shumë sektorë i kanë ndjerë krizat e njëpasnjëshme të nisura me tërmetin, që vazhduan me pandeminë dhe tani me rritjen e çmimeve.

Në të ardhmen, qeveria pret një shumë të konsiderueshme të ardhurash të vijnë nga pjesëmarrja si aksioner 33% në projektin për Marinën e Durrësit.

https://a2news.com/2022/11/23/tatimi-i-vecante-per-energjine-shteti-merr-gjysmen-e-shitjeve-mbi-8-5-leke-kwh/

A2 CNN Livestream

Debat - nga Alba Alishani