Sondazh: Destinacionet e fundjavave tuaja janë:
  • Bregdeti 60%
  • Zonat malore 20%
  • Qendrat historike 20%

Siguri për vendin dhe rajonin, Finlanda kalon pengesën e fundit për në NATO, Suedia jo 

Nga A2 CNN
31 Mars 2023, 12:55 | Bota
Siguri për vendin dhe rajonin, Finlanda kalon pengesën e fundit

Finlanda do të bëhet anëtari i 31-të i NATO-s pasi parlamenti turk votoi për t’i dhënë dritën jeshile kërkesës së shtetit nordik, për t’iu bashkuar aleancës ushtarake. Turqia e mbajti pezull ambicien e Finlandës për t’u anëtarësuar në aleancën perëndimore të mbrojtjes për muaj me radhë, me pretendimin se shteti nordik mbështet terroristët. Për të njëjtën arsye, Ankaraja vazhdon të bllokojë Suedinë e cila aplikoi në të njëjtën kohë me Finlandën, majin e vitit të kaluar. Çdo zgjerim i aleancës do të kërkonte mbështetjen e të gjithë pjesëtarëve.

Finlanda do të pranohet zyrtarisht në samitin e radhës, që do të mbahet gjatë muajit korrik në Lituani në një prej momenteve më të rëndësishme të viteve të fundit

“Mendoj se jemi gati. Mendoj se anëtarësimi do të na japë më shumë siguri”.

Finlanda, shtet deri më tani neutral ndan një kufi prej 1340 km me Rusinë dhe ka një prej arsenaleve më të pasura të artilerisë.  Hyrja e saj në NATO, shënon një goditje të madhe strategjike për presidentin rus Vladimir Putin. Në një deklaratë pas votimit në parlamentin turk, qeveria finlandeze tha se hyrja në aleancë do të fuqizonte sigurinë në vend dhe do të përmirësonte stabilitetin dhe sigurinë në rajon. 

“Si aleatë, ne do të japim dhe do të marrim siguri. Do të mbrojmë njëri-tjetrin. Finlanda qëndron pranë Suedisë tani dhe në të ardhmen dhe mbështet aplikimin e saj”, tha Sanna Marin.

Presidenti turk, Rexhep Taip Erdogan, dha aprovimin e tij ndaj anëtarësimit të Finlandës më herët gjatë muajit, duke vlerësuar hapat konkretë të vendit lidhur me sigurinë në Turqi. Por kundërshtia e tij ndaj Suedisë vijon të jetë e fortë, dhe sërish e akuzoi vendin se po mbështet militantët kurde, dhe po i lejon të manifestojnë në rrugët e Stokholmit.

A2 CNN Livestream

Debat - nga Alba Alishani