Takimi me Xi Jinping, Putin: Plani kinez i paqes, bazë e mirë për fundin e luftës

Nga A2 CNN
22 Mars 2023, 12:29 | Bota
Takimi me Xi Jinping, Putin: Plani kinez i paqes, bazë e mirë për

Plani i paqes i propozuar nga Kina mund të përdoret si bazë për t’i dhënë fund luftës në Ukrainë. Këtë e tha presidenti Vladimir Putin pas bisedimeve të zhvilluara me homologun kinez Xi Jinping ditën e martë në Moskë, lidhur me konfliktin dhe marrëdhëniet mes dy vendeve. Por sipas numrit një të Kremlinit, Ukraina dhe aleatët e saj perëndimorë nuk janë të gatshëm ta pranojnë atë.

“Ne besojmë se shumë nga pikat e planit të propozuar nga Kina janë në përputhje me qasjen ruse dhe mund të merren si bazë për një marrëveshje paqësore kur Perëndimi dhe Kievi të jenë të gatshëm për këtë”, tha Putin.

Plani me 12 pika i Kinës nuk i kërkon në mënyrë të drejtpërdrejtë Rusisë të largohet nga Ukraina. Ai bën thirrje për bisedime paqeje dhe respektim të sovranitetit kombëtar, por pa propozime specifike. Por Kievi këmbëngul që trupat e Moskës të largohen nga territori i vet si kusht për çdo lloj bisedimesh, dhe nuk ka asnjë sinjal se Rusia është e gatshme ta bëjë këtë. Duke qëndruar krah liderit rus, Jinping theksoi se qeveria e tij ishte në favor të paqes dhe dialogut dhe se Kina qëndronte në anën e duhur të historisë.

“Dua të theksoj se në planin për fundin e luftës në Ukrainë në mbështetemi te parimet e Kartës së Kombeve të Bashkuara dhe kemi një qëndrim objektiv dhe të paanshëm. Ne promovojmë në mënyrë aktive pajtimin dhe nisjen e bisedimeve”, tha presidenti Kinez.

Pas vizitës dyditore, ku aleati i ngushtë i rezervoi një pritje madhështore, me tapet të kuq, muzikë dhe shumë buzëqeshje, Jinping la Rusinë të mërkurën. Gjatë qëndrimit, ai e cilësoi Moskën dhe Pekinin si fuqi të mëdha fqinje dhe partnerë strategjik. Dy udhëheqësit firmosën dokumente për thellimin e bashkëpunimit dhe shprehën shqetësim për rritjen e pranisë së NATO-s në Azi. Perëndimi është i shqetësuar se Kina mund t’i sigurojë ndihma ushtarake Rusisë për luftën në Ukrainë.   

A2 CNN Livestream

Ditari nga Bruna Çifligu