Thesaret e Arkivit, zbuloni si duket një libër 600-vjeçar përmes një ekspozite

Antikuarë dhe libra të vjetër nxirren nga fondi i Arkivit të Shtetit për t’u ekspozuar në kalanë e Tiranës. Ekspozita do të jetë e hapur vetëm pasditeve, për të ruajtur sa më mirë këto vepra të cilat janë origjinale dhe nuk kanë kopje të dytë.
Thesare nga biblioteka e Arkivit të Shtetit dalin përballë dashamirësit e librit të vjetër. Në gjendje të mirë dhe të ruajtura me kujdes, këto botime të vjetra që nuk kanë një kopje të dytë ekspozohen nga kjo pasdite në kalanë e Tiranës.
Përmes stendave të qelqta ju mund të shijoni botime gati 600 vjeçare. Ardit Bido, drejtor i Arkivit, tregon se këto libra janë pjesë e arkivit si rezultat edhe i dhurimit të këtyre thesareve.
“Nuk ka kopje të dytë në vend të këtyre veprave, antikuari më i vjetër është i 1506, është 600 vjeçar tashmë. Shumica janë libra fetare, por ka libra poezish, historike, trakte. Rendësi ka që tani janë të aksesueshme, ndërkohë që më parë gjendeshin në disa thasë”, thotë Bido.
Vizitorët e parë të stendave ishin fëmijët të cilët me dëshirën për të njohur si botoheshin dikur librat, shijuan edhe një shëtitje artistike mes stendave me ministren e Kulturës.
Ekspozita do të jetë e hapur vetëm gjatë pasditeve në mënyrë që këto libra të vjetër dhe antikuarët t’i ruajmë sa më gjatë në gjendje të mirë, ashtu sikurse i gjejmë edhe në këto stenda.