Përpunimi i naftës në Rusi ka rënë vetëm 3% këtë vit pavarësisht sulmeve më të mëdha me dronë të Ukrainës deri më sot, pasi rafineritë shmangën një rënie të ndjeshme të prodhimit të karburantit duke shfrytëzuar kapacitetin rezervë për të kompensuar dëmet nga sulmet. Kështu bëjnë me dije burime diplomatike për Reuters.
Ukraina ka shtuar sulmet me dronë thellë brenda Rusisë, duke synuar të shkatërrojë rafineritë, depot dhe tubacionet e naftës dhe të paralizojë burimin më të madh të financimit të Moskës për luftën në Ukrainë. Shumica e sulmeve ndodhën në fillim të vitit 2025 dhe më pas rifilluan nga gushti, shkruan A2 CNN. Dronët ukrainas goditën të paktën 17 rafineri të mëdha në total, duke e detyruar Rusinë, eksportuesin e dytë më të madh të naftës bruto në botë, të frenojë eksportet e karburantit dhe të porosisë mbrojtje shtesë nga dronë.
Në kulmin e valës së dytë të sulmeve midis gushtit dhe tetorit, sulmet dhe mirëmbajtja e planifikuar nxorën jashtë funksionit 20% të kapacitetit të rafinerisë së Rusisë, sipas llogaritjeve të Reuters bazuar në informacione nga tre burime ruse të industrisë.
Por kjo rezultoi vetëm në një rënie prej 6% të vëllimeve totale të rafinimit rus në rreth 5.1 milion fuçi në ditë - një ulje prej rreth 300,000 fuçish në ditë krahasuar me të njëjtën periudhë të vitit të kaluar - thanë burimet dhe treguan të dhënat. Në përgjithësi, nga janari deri në tetor, përpunimi i naftës ra në rreth 220 milion ton metrikë (5.2 milion fuçi në ditë), 3% më pak se vitin e kaluar. Burimet folën në kushte anonimiteti për shkak të ndjeshmërisë së çështjes. Rusia nuk publikon më të dhëna mbi rafinimin e naftës.
Ministria e Energjisë e Rusisë nuk pranoi të komentojë. Ndarja midis mirëmbajtjes së planifikuar dhe të paplanifikuar nuk ishte e disponueshme. Tre burimet e industrisë i thanë Reuters se rafineritë ruse funksiononin shumë nën kapacitetin e tyre të plotë para sulmeve dhe ishin në gjendje të zbutnin ndikimin e tyre duke rinisur njësitë rezervë si në impiantet e dëmtuara ashtu edhe në ato të paprekura, si dhe duke i rikthyer në punë njësitë e sulmuara pas riparimeve. (A2 Televizion)
A2 CNN Livestream
MUND TE LEXONI GJITHASHTU
