SHBA-të dhe Irani kanë shkëmbyer sulme ajrore në të gjithë Lindjen e Mesme për të dytën ditë radhazi, duke e tensionuar më tej armëpushimin tashmë të paqëndrueshëm të arritur midis dy vendeve në prill.
Komanda Qendrore e SHBA-së (Centcom) tha se kishte përfunduar një valë "sulmesh vetëmbrojtëse" që synonin qendrat ushtarake, të mbikëqyrjes dhe të radarëve në Iranin jugor.
Sulmi erdhi disa orë pasi Presidenti Donald Trump u zotua se forcat amerikane do ta godisnin Iranin “fort” dhe se Teheranit i ishte dashur “shumë kohë për të arritur një marrëveshje” për t’i dhënë fund përgjithmonë luftës.
Në përgjigje, Irani nisi një raund sulmesh që targetonin asetet ushtarake amerikane në vendet e rajonit.
Bazat ushtarake amerikane në Bahrein dhe Kuvajt u vunë nën sulmin iranian për të dytën ditë radhazi, ndërsa Trupat e Gardës Revolucionare Islamike (IRGC) të Iranit thanë se qëlluan me raketa balistike një qendër komande amerikane në Jordani, sipas mediave shtetërore iraniane.
Garda Revolucionare e Iranit (IRGC) pretendoi se kishte shkatërruar “një numër të madh” avionësh luftarakë amerikanë dhe “objektesh” pasi qëlloi 12 raketa balistike në bazën ajrore Muwaffaq Salti në Jordani.
Ministria e Brendshme e Bahreinit tha se sirenat e saj të sulmit ajror u aktivizuan gjatë natës, ndërsa Ushtria e Kuvajtit postoi në X se sistemet e saj të mbrojtjes kundërajrore interceptuan "objektiva ajrore armiqësore". Kuvajti tha se kishte mbyllur përkohësisht hapësirën ajrore për shkak të sulmeve iraniane.
(A2 Televizion)
A2 CNN Livestream
MUND TE LEXONI GJITHASHTU
