Vrasja në Burgun e Peqinit, emërohet drejtori i ri

Në burgun e Sigurisë së Lartë në Peqin është emëruar drejtori i ri, Florenc Doka.

Emërimi i tij vjen pasi ish-drejtuesi i këtij institucioni të vuajtjes së dënimit, Kamber Hoxha, u arrestua bashkë me zyrtarë të tjerë pasi Sokol Mjacaj, i mori jetën Arben Lleshit dhe plagosi të dënuarin tjetër, Ilir Shaqjan.

Emërimi i Dokës është firmosur nga ministri i Drejtësisë, Ulsi Manja, gjatë ditës së djeshme.

Pas vrasjes, Gjykata e Elbasanit miratoi kërkesën e Prokurorisë për lënien në qeli të Sokol Mjacajt dhe gjithë personave të tjerë të arrestuar përfshi edhe ish-drejtorin e institucionit.

Nga qelia shpëtoi vetëm një efektiv i burgut, i cili u la në arrest shtëpie për shkak se ka një fëmijë të mitur.

NGJARJA

Të premten, më 15 dhjetor, Sokol Mjacaj, i dënuar me burgim të përjetshëm dhe i transferuar në regjimin 41b, vrau me armë zjarri të burgosurin tjetër Arben Lleshi, si dhe plagosi një tjetër të dënuar, Ilir Shaqjen.

Për ngjarjen u arrestuan edhe 12 efektivë të burgut të Peqinit, mes të cilëve edhe drejtori, Kamber Hoxha.

Masat e miratuara, arrest me burg: Sokol Mjacaj, Kamber Hoxha, Qani Muça, Nikolin Gjonpali, Arben Dulellari, Ilir Balla, Florenc Mile, Fatos Pire, Genci Muça, Klement Haka, Erjon Çilaj, Indrit Dubali.

Autoritetet po hetojnë për pistën e vrasjes me pagesë, ndërsa dëshmitë e të arrestuarve dhe të burgosurit të plagosur, Ilir Shaqja, kanë hedhur më shumë dritë mbi ngjarjen.

Indrit Shaqja ka deklaruar gjatë marrjes në pyetje se gjatë gjithë kohës që ka qenë në burg, dy herë në sportelin e derës së dhomës ka gjetur dy letra të shkruara me shkrim dore, një rreth katër vjet më parë dhe tjetrën rreth një viti e gjysmë më parë, me të njëjtën përmbajtje.

“Do të paguajmë 200 mijë euro, do të sigurojmë edhe helmin që ta kryesh vrasjen e Arben Lleshit. Nëse je dakord, na kthe përgjigje me letër”, lexohej në letrat e lëna në derën e të dënuarit të plagosur nga Sokol Mjacaj. (A2 Televizion)