Vendimin për masën e sigurisë “arrest shtëpie”, ish-kryeministri Sali Berisha e sheh si një dëshmi të një hakmarrjeje politike të Edi Ramës, megjithatë thekson se as kjo nuk do e ndalë. Me anë të një reagimi në profilin e tij në Facebook, Berisha thotë se vendimi i caktuar ditën e sotme nga GJKKO nuk ishte aspak surprizë për të. Kjo sepse sipas tij, e gjitha ka si qëllim eliminimin e opozitës, mirëpo thekson se kjo kurrsesi nuk do të ndodhë.
Ai theksoi më tej se me apo pa policë te dera asgjë nuk do ta ndajë nga mbështetësit, ndërsa shtoi se çdo masë që merr pushteti ndaj tij dhe opozitës është e përkohshme.
Prandaj, shton se nuk do të ndalet, por do të vazhdojë që të punojë, me të gjitha format dhe mjetet për të rikthyer demokracinë që sipas tij, është e shpërfytyruar. Se cilat do të jenë këto forma dhe mënyra, në një kohë kur ndodhet në arrest shtëpie dhe kur i ndalohet komunikimi me persona të tjerë përtej atyre që bashkëjeton, Berisha nuk e ka specifikuar. Megjithatë, ka zgjedhur që të përdorë dritaren e tij të komunikimit në rrjetet sociale për t’i ftuar qytetarëve që të ngrihen “o sot, o kurrë” në protestë kundër asaj që ruan regjimi i Edi Ramës.
“Të nderuar miq, demokratë, shqiptarë kudo ku ndodheni. Sot ndodhi ajo që të gjithë e dinim, izolimi dhe heqja e të drejtës së fjalës të liderit të opozitës nga narko-regjimi më mafioz i bastardit të ish-xhelatëve shqiptarë Kristaq Rama dhe Spiro Koleka, Edi Ramës që është dhe regjimi diktatorial më i korruptuar në Europë dhe më gjerë. Kjo masë arresti politik, dëshmi e një hakmarrje politike të verbër të Edi Ramës, nuk shpreh vetëm urrejtjen e tij të trashëguar ndaj kundërshtarit, por mbi të gjitha shpreh frikën, tmerrin që ne të dashur miq i kemi kallur atij deri në palcë dhe botës së tij të krimit me betejën tonë pa kthim.
Ai që mendon se asgjesoi pluralizmin dhe opozitën do ketë fatin që populli opozitar i rezervon armiqve të lirisë, diktatorëve. Të dashur miq, Sali Berisha është dhe do të jetë ai që ka qënë gjithmonë. Me apo pa arrest shtëpie, me apo pa policë tek dera, asgjë nuk do mund ta ndajë dot atë nga ju, jo vetëm demokratë, por edhe shqiptarë kudo që ata ndodhen. Sali Berisha do të vazhdojë të punojë dhe të luftojë çdo minutë, me të gjitha format dhe mjetet për të rikthyer demokracinë që aktualisht është e shpërfytyruar: Më shumë nga të gjithë që e kupton se litari i kalbur po i këputet është vetë Edi Rama.
Unë jam i bindur se sot jemi sëbashku jo thjesht ata demokratë që janë në krah të Sali Berishës, por dhe ata shqiptarë që e ndjejnë dhe e përjetojnë se Shqipëria është në rrezik. Ata janë shumica e qytetarëve të këtij vendi, ndaj a e dini pse fitorja jonë është e padiskutueshme? Është e tillë sepse ata që duan Shqipërinë janë më shumë se ata që duan thjesht Sali Berishën. Së fundmi, çdo masë që merr ky pushtet ndaj meje dhe opozitës është e përkohshme. Ajo që mbetet e pamposhtur është mosdorëzimi ynë dhe vendosmëria jone që izolimin e opozitës ta kthejmë në betejë lirie dhe në fitore për shqiptarët.
Ndaj dhe ju ftoj të vazhdojmë me moton “O SOT O KURRË” betejën tonë pa kthim edhe më të fortë, të vendosur dhe më me pasion e guxim se kurrë më pare”, njofton Berisha.
Ky reagim vjen pas vendimitë GJKKO, për masën e sigurisë “arrest shtëpie” ndaj Sali Berishës dhe ndalim të komunikimit me persona të tjerë, me të cilët ai nuk bashkëjeton. Për Rithemelimin, kjo masë nuk do e ndalë Berishën, e ndërsa për kryeministri Edi Rama tha se nuk e konsideron si një fitore. (A2 Televizion)
A2 CNN Livestream
MUND TE LEXONI GJITHASHTU
