Këngëtarja e famshme uellsiane Bonnie Tyler, e njohur botërisht për hitin e saj të pavdekshëm “Total Eclipse of the Heart”, është ndarë nga jeta në moshën 75-vjeçare, shkruan A2 CNN. Lajmi u bë i ditur përmes një deklarate zyrtare të publikuar në faqen e saj të internetit dhe në rrjetet sociale këtë të enjte.
Sipas njoftimit të shpërndarë nga familja dhe ekipi i saj, ylli i muzikës ndërroi jetë papritur mbrëmjen e së mërkurës në një spital në Portugali, ku po trajtohej për një sëmundje. Familjarët kanë kërkuar privatësi në këtë moment të vështirë, duke shtuar se një deklaratë më e detajuar do të jepet së shpejti.
Humbja e këngëtares, emri i vërtetë i së cilës ishte Gaynor Hopkins, erdhi pas një beteje të vështirë me shëndetin. Në muajin maj, u bë e ditur se Tyler i ishte nënshtruar një operacioni urgjent në zorrë dhe ishte vendosur në koma artificiale. Edhe pse një përditësim në mes të qershorit konfirmoi se ajo kishte dalë nga koma, gjendja e saj mbetej e rënduar në kujdesin intensiv.
Bonnie Tyler arriti kulmin e suksesit në vitet 1980, kur kënga “Total Eclipse of the Heart” pushtoi vendet e para të klasifikimeve muzikore në Britaninë e Madhe dhe SHBA. Karriera e saj e pasur numëron edhe hite të tjera të mëdha si “Holding Out For A Hero”, kolonë zanore e filmit të famshëm "Footloose" (1984), “It’s A Heartache” dhe “If You Were A Woman (And I Was A Man)”. Pavarësisht problemeve shëndetësore, ajo kishte planifikuar të rikthehej në skenë me disa koncerte të programuara për këtë vit.
Për kontributin e saj të jashtëzakonshëm në muzikë, Tyler u nderua në vitin 2023 me titullin prestigjioz MBE (Anëtare e Urdhrit të Perandorisë Britanike). Kryeministri i Uellsit, Rhun ap Iorwerth, shprehu pikëllimin e tij të thellë, duke e cilësuar atë si një "ikonë të vërtetë" që i solli gëzim gjithë botës me muzikën e saj. (A2 Televizion)
A2 CNN Livestream
MUND TE LEXONI GJITHASHTU
