Pas takimit të rrallë në Korenë e Veriut, me liderin autokrat Kim Jong Un, presidenti Vladimir Putin mbërriti në kryeqytetin Vietnamez, Hanoi, ku u prit me nderime të larta ushtarake, përfshirë 21 të shtëna me armë.
I izoluar nga Perëndimi, Putin po përpiqet të forcojë lidhjet ekonomike me shtetet mike dhe të tregojë se sanksionet perëndimore nuk kanë ndikim te vendi i tij. Presidenti i Vietnamit komunist, To Lam, foli për thellim të partneritet strategjik me Moskën dhe u zotua të forcojë bashkëpunimin me të.
Ai e përgëzoi Putinin për rizgjedhjen dhe vlerësoi arritjet e Rusisë, përfshirë stabilitetin e brendshëm politik.
“Edhe një herë përgëzime mikut tonë për sigurimin e mbështetjes dërrmuese gjatë zgjedhjeve presidenciale, diçka që tregoi besimin e popullit rus”, u shpreh To Lam.
Putin u përgjigj duke thënë se partneriteti strategjik me Vietnamin është një prej prioriteteve të Rusisë. Ai tha se respektonte dialogun me bllokun rajonal, Grupi i Vendeve të Azisë Juglindore, në të cilin u shpreh se Vietnami luante një rol aktiv.
Putin i cili mbërriti në Hanoi në orët e para të së enjtes, është në ndalesën e fundit të turit të vizitës së tij në dy vende aziatike, pasi përmbylli një pakt mbrojtjeje me Korenë e Veriut. Ajo angazhon vendet të përdorin çdo mjet të mundshëm për të mbështetur ushtarakisht njëri tjetrin, në rastin se ndonjëri prej tyre sulmohet.
Pritja e Putinit, nga ana e Vietnamit ka nxitur kritika nga partneri kyç, Shtetet e Bashkuara që kanë përmirësuar marrëdhëniet diplomatike me Hanoin vitin e kaluar, dhe është eksportuesi kryesor i vendit. Në një deklaratë, ambasada amerikane tha më herët se Vietnami nuk duhet t’i japë Putinit një platformë për të promovuar luftën ruse në Ukrainë. (A2 Televizion)
A2 CNN Livestream
MUND TE LEXONI GJITHASHTU
