Mëngjesi i të hënës e gjeti sërish Parlamentin të rrethuar nga të katër anët me gardhe të Policisë.
Seanca e zhvilluar jashtë radhe e Kuvendit mblodhi dhjetëra protestues të pajisur me shporta me vezë, por edhe me fruta. Përgatitja për t’i hedhur ato drejt policisë apo deputetëve nuk u realizua, ndërsa përpjekjet për të çarë kordonin blu u pasuan me shoqërime.
Këto pamje tregojnë momentin kur Dritan Goxhaj ndalohet nga efektivët e Policisë për t’u shoqëruar në komisariat.
Arben Kolapo i shpëtoi tentativës së parë për t’u shoqëruar, duke u futur në një korsi për të kaluar në anën tjetër. Megjithatë, edhe rezistenca e tij zgjati pak. Disa efektivë e kapën nga këmbët dhe krahët, për ta ngritur dhe dërguar drejt automjetit të Policisë.
Protestuesit u shpërndanë në disa grupe, ndërsa marshuan disa herë nga Sheshi i Ushtarit të Panjohur drejt Ministrisë së Brendshme dhe më pas drejt Urës së Rrugës së Elbasanit. Në çdo rrugë që të çonte drejt Parlamentit, ata u përballën me efektivët e Policisë.
Makinat ujëhedhëse të Policisë nuk u përdorën, ndryshe nga seanca e javës së kaluar. Po ashtu, edhe vezët e përgatitura nga protestuesit mbetën të paprekura, të paktën deri në mbylljen e seancës së parë. Policia shoqëroi gjashtë protestues, të cilët u liruan pas rreth dy orësh. (A2 Televizion)
A2 CNN Livestream
MUND TE LEXONI GJITHASHTU
